Иако ѝ се допаднале Рива, стариот дел на градот и Бачвице, цените не ја воодушевиле толку многу. На крајот заклучила и дека Трогир ѝ се допаднал повеќе.

„Денес го посетивме Сплит и веднаш ќе ви кажам дека Трогир многу повеќе нѝ се допадна“, рече таа на почетокот од видеото.

Ручек за двајца платиле 60 евра

Првиот трошок бил превозот. Јована раскажа дека автобусот од Каштела до Сплит го платиле околу четири евра по лице. По пристигнувањето прошетале низ старото градско јадро, а ѝ пречеле жештината и како што рече, нечистотијата.

Потоа отишле на ручек во ресторан што не го избрале однапред.

„Ручавме во некој случајно избран ресторан и за ручек за двајца плативме 60 евра, што е многу, а и келнерот беше прилично нерасположен“, раскажа таа.

По ручекот се упатиле кон плажата Бачвице, која, за разлика од некои други делови на Сплит, пријатно ја изненадила. Ѝ се допаднало тоа што плажата е песочна и релативно блиску до центарот.

Но, повторно ја изненадиле цените. За две лежалки и чадор за сонце платиле 30 евра, иако ги користеле само два и пол часа. Како што рече, сепак морале да ја платат целата цена. За кафе и кока-кола дополнително платиле десет евра.

„Решивме дома да јадеме паштета“

По капењето продолжиле да го разгледуваат градот, а вечерниот Сплит ѝ оставил подобар впечаток.

„Рива е убава, стариот град е убав, но кога видовме дека седум ќебапи чинат 17 евра, решивме дома да јадеме паштета“, раскажа таа.

Сепак, не ѝ биле сите цени превисоки. Печената пченка од три евра ја оценила како сосема прифатлива, а на своите следбеници им открила и каде пронашла поевтини сувенири. За магнет платила околу три евра, додека, според нејзините зборови, на други места наидувала на цени повисоки од пет евра.

Особено се пошегувала околу посетата на Диоклецијановата палата.

„Кај Диоклецијановата палата ни беше убаво бидејќи не нѝ наплатија за седењето на скалите“, рече таа.

Призна дека можеби не ги избрале најдобрите места

Сепак, Јована на крајот од видеото не тврди дека нејзиното искуство го претставува целиот Сплит.

„Можеби не ги избравме вистинските локации, па малку се изгубивме, а во секој случај би било добро во коментарите да го споделите вашето искуство“, заклучи таа.