Решението за полесни разделби се крие во кратка и предвидлива рутина, пишува „Parents Together“.

Исти зборови

Ако постојано се обидувате да му објасните на детето зошто мора да заминете, разделбата само се одолжува, а несигурноста кај детето се зголемува. Терапевтите советуваат спротивен пристап – кратка и секогаш иста реченица го прави заминувањето предвидливо, а токму предвидливоста им дава на децата чувство на сигурност.

Ваквото сценарио за деца од предучилишна возраст е осмислено да се повторува. Важно е да осмислите сопствена верзија и секое утро да ги користите истите зборови и гестови, по истиот редослед. Со доволно време и трпение, оваа рутина би требало да ја ублажи вознемиреноста на детето поради разделбата.

Воспоставете рутина за разделба

Родителот може да се спушти на нивото на детето и да каже: „Безбеден/безбедна си. Воспитувачката се грижи за тебе. Јас секогаш се враќам“.

Кога детето протестира и бара да останете, важно е да ги прифатите неговите чувства, но истовремено да останете доследни. Може да му одговорите: „Знам дека е тешко. И ти ќе ми недостигаш. Одам на работа и ќе се вратам по тебе по ужината“.

Потоа следува кратка и секогаш иста рутина за поздравување. Тоа може да биде бакнување на дланките за детето да ги „зачува“ бакнежите за подоцна, пеење посебна песничка, таен поздрав со рацете или давање мала задача, како: „Однеси го твоето шишенце на место“ или „Предај ѝ го ова на воспитувачката“.

Штом ќе заврши рутината, клучно е да го предадете детето на воспитувачката и да заминете без двоумење. Иако на родителите тоа може да им изгледа тешко, долгите разделби не покажуваат сочувство, туку само го отежнуваат процесот и за детето и за вас.

Ако чувствувате потреба, исплачете се подоцна во автомобилот. Во моментот на заминување, детето треба да ја почувствува вашата сигурност дека го оставате на безбедно место.