[ФОТО/ВИДЕО] Никол Кидман и Сандра Булок воодушевиле во Лондон: Кога се појавиле во овие изданија, настанала „магија“: Едната носела „Шанел“, другата „Живанши“, а како тандем се ненадминливи

Кидман и Булок за црвениот килим во киното „Odeon Luxe Leicester Square“ во Лондон избрале фустани со слично деколте и впечатлив шлиц.

Првата блеснала во фустан од „Шанел“, прекриен со светки, со слоевити низи од златни синџири и бисери кои паѓаат преку деколтето и формираат нежни, спуштени ракави. Исто така и сандалите и висечките обетки од 18-каратно жолто злато што Кидман ги носела се со потписот на „Шанел“, култната модна куќа чијашто амбасадорка е таа.

Втората се појавила во фустан од „Живанши“ со леопардов дезен и драматичен крој, во комбинација со ретро сандали.

Фризурата на Кидман била во стилот на лежерен шик, додека онаа на Булок била уште поопуштена.

Светската јавност е воодушевена од враќањето на сестрите Овенс, Сали и Џилијан, кои познатите актерки ги играат во продолжението на незаборавниот филм. Ликовите на истите хероини ги толкуваа и во првиот дел од 1998 година. Булок токму со улогата во вториот дел се враќа на филмското платно по подолга пауза.

Сали и Џилијан потекнуваат од древно семејство на вештерки кое носи тешко, повеќегенерациско проклетство: секој маж кој ќе се вљуби во жена од семејството Овенс трагично страда. Иако се карактерно целосно различни, нивната сестринска врска е најсилната магија која ги штити од сите неволји.

Во продолжението „Практична магија 2“, Сали Овенс (Булок) ја продолжува приказната со своите возрасни ќерки, кои ја наследуваат семејната моќ. Нејзините наследнички ги играат Џои Кинг и Мејси Вилијамс, кои исто така присуствувале на синоќешната лондонска премиера на филмот, чиј прв дел беше многу популарен и меѓу регионалната публика.