Загрижени жители од улицата Орце Николов во Карпош алармираат за сериозен проблем со старите и оштетени контејнери за отпад, од кои по секој дожд истекува загадена вода и се разлева по коловозот.
Фотографиите испратени до нашата редакција најдобро ја покажуваат состојбата. Асфалтот околу контејнерите и значителен дел од улицата е видливо поцрнет, а според жителите причината не е дождот или вообичаена нечистотија на коловозот. Станува збор за течност која истекува директно од контејнерите.
Како што објаснуваат граѓаните, контејнерите се стари, искршени и дупнати. Кога врне дожд, водата навлегува во нив, се меша со отпадот кој се наоѓа внатре, а потоа преку оштетените делови истекува на улицата. Токму оваа течност зад себе ги остава темните траги кои јасно се забележуваат и на фотографиите.
Проблемот, велат жителите, не завршува со грдата слика. Наталожената течност од отпадот создава исклучително непријатна миризба која се шири по улицата, а ситуацијата е особено тешка во летниот период и при високите температури.
Граѓаните велат дека состојбата порано не била ваква и стравуваат дека доколку проблемот продолжи, просторот околу контејнерите може да стане потенцијално жариште за инсекти, глодари и други ризици по хигиената и здравјето.
Дополнителен проблем е што контејнерите се наоѓаат непосредно покрај тротоар, па покрај нив секојдневно минуваат голем број пешаци и жители од околните згради.
Жителите на Орце Николов бараат надлежните служби да излезат на терен, да ја проверат состојбата и дотраените и дупнати контејнери да бидат заменети со исправни. Воедно, бараат да се исчисти и просторот околу нив, како и делот од коловозот по кој со денови се разлева течноста од отпадот.
Во услови на високи летни температури, ваквата состојба не треба да се сведе само на прашање на естетика. Преполни и оштетени контејнери, отпад, загадена вода и непријатна миризба среде населено место се проблем кој бара навремена реакција, пред ситуацијата дополнително да се влоши.
