Министерот за правда Јетон Шасивари се сретна со францускиот амбасадор Кристоф Ле Риголер за потврдување на силната соработка и поддршка во реформските процеси и европската интеграција на Македонија, со акцент на владеењето на правото и климатските прашања.
Министерот за правда, Јетон Шасивари, оствари средба со амбасадорот на Република Франција во Северна Македонија, Кристоф Ле Риголер, на која беа потврдени одличната соработка и заедничката посветеност кон унапредување на владеењето на правото и европската интеграција на земјата.
Шасивари ја истакна целосната подготвеност на Министерството за правда за забрзано спроведување на реформите согласно препораките на Европската комисија и обврските поврзани со Кластер 1 – Фундаментални вредности.
„Франција е наш значаен партнер во процесот на европска интеграција. Остануваме целосно посветени на реформите во областа на владеењето на правото и на исполнувањето на европските стандарди“- порача министерот.
Особено беше истакната француската поддршка преку експертскиот ангажман на Сесил Марони, која обезбедува стручна поддршка на Министерството за правда во процесот на европска интеграција.
На средбата беше разговарано и за соработката во областа на климатската и еколошката правда, во рамките на регионалниот проект „Конвергенција на климатската и еколошката правда“ (CEJ Convergence).
Континуираната експертска и институционална поддршка ќе придонесе кон создавање поефикасен и подостапен правосуден систем за граѓаните.
