Цените на недвижностите станаа голем проблем за младите луѓе низ Европа, дури и за оние со високи приходи и значителни заштеди. Британката Фили Гарет (33) го почувствувала ова на своја кожа, која и покрај добро платената работа, сфатила дека не може да си дозволи пристоен стан во Лондон.

Фили заработувала 55.000 фунти годишно, додека на банкарската сметка имала повеќе од 40.000 фунти наменети за учество.

Таа верувала дека купувањето сопствен дом е само прашање на време, но реалноста на лондонскиот пазар на недвижности брзо ја разубедила.

Дури и со таков приход и заштеди, таа не можела да купи соодветен стан во безбеден дел од градот, доволно блиску до нејзиното работно место. Кога нејзиниот газда го откажал нејзиниот договор за закуп, таа морала брзо да најде друго решение.

„Беше обесхрабрувачки што успеав да заштедам солидна сума, но не можев да си дозволам стан во дел од градот што изгледаше безбеден и беше блиску до работа“, изјавила Фили.

Наместо мал стан, таа купила куќа со три спални соби

Се откажала од идејата да купи стан со една спална соба на периферијата на Лондон и одлучила да се пресели во Рединг. Таму купила куќа со три спални соби во 2020 година за 267.000 фунти.

Уште од самиот почеток имала јасен план. Го реновирала имотот и почнала да ги издава двете празни соби под наем. Приходите од закупците ѝ помогнале да ги покрие трошоците и да ги олесни отплатите на хипотеката.

„Приходот од издавање соби далеку ги надминува вкупните трошоци за реновирање на мојата куќа“, објаснила таа.

Одлуката се покажала како добра поради зголемувањето на вредноста на недвижниот имот. Куќата за која платила 267.000 фунти сега е проценета на околу 415.000 фунти, што е околу 148.000 фунти повеќе од куповната цена.

Таа ја изгубила работата, па започнала свој проект

Фили со години работи во маркетингот, а нејзината годишна плата оттогаш достигнала 75.000 фунти. Кога ја изгубила работата, таа одлучила своето искуство со купување недвижен имот да го претвори во бизнис идеја.

Таа го започнала проектот „Кукун“, чија цел е да им помогне на луѓето да го купат својот прв дом заедно со пријатели или други заинтересирани лица.

„Не верувам дека поседувањето куќа и можноста за создавање средства треба да зависат од тоа дали сте во врска“, рекла таа.

Според неа, многу луѓе го одложуваат купувањето дом додека чекаат партнер, наследство или некоја друга голема промена. Сепак, таа пронашла поинаков модел. Купила поголема куќа надвор од Лондон и ги користи приходите од изнајмувањето на собите за да си помогне во отплатата на хипотеката.

Таквото решение бара подготвеност за преселба и споделување на просторот за живеење, но во време на рекордно високи цени на недвижностите, тоа би можело да биде пореален начин за многумина да добијат свој дом.