За првпат тие идентификуваа специфични бактерии поврзани со заштитниот ефект на таквата средина, што во иднина би можело да помогне во развојот на нови начини за превенција и лекување на алергиските заболувања.

Откритието е резултат на работата на меѓународен истражувачки тим предводен од експерти од клиниката ЛМУ и истражувачкиот центар „Helmholtz Munich“.

Имунолошкиот систем уште од најрана возраст се среќава со различни микроорганизми

Резултатите од истражувањето се надоврзуваат на таканаречената хигиенска хипотеза, која се појавила кон крајот на 1980-тите години. Лекарите тогаш забележале нагло зголемување на бројот на алергии и случаи на астма во развиените индустриски земји. Според оваа теорија, на имунолошкиот систем на децата во првите години од животот му е потребен контакт со различни микроорганизми за да научи да ги разликува безопасните од потенцијално штетните надразнувачи. Доколку нема доволно такви контакти, би можел да се зголеми ризикот од прекумерни реакции на супстанции како полен или домашна прашина.

Децата кои растат на фарми со добиток секојдневно се изложени на голем број микроорганизми. Од клиниката ЛМУ објаснуваат дека токму тие можат да дејствуваат како еден вид тренинг за имунолошкиот систем и да помогнат во спречувањето на прекумерните воспалителни реакции.

Клучот би можеле да бидат бактериите од шталите

Во рамките на студијата, чии резултати се објавени во научното списание „NEJM Evidence“, истражувачите анализирале податоци од повеќе од 1.000 деца од неколку европски земји. Тие анализирале брисови од нос, примероци од прашина од душеци, како и прашина од штали од 47 земјоделски стопанства. Притоа користеле генетски анализи, метаболички испитувања и компјутерски модели за да се обидат да утврдат што стои зад заштитниот ефект на таквата средина.

Тие издвоиле два вида бактерии кои би можеле да објаснат голем дел од овој ефект: „Romboutsia timonensis“ и „Glutamicibacter arilaitensis“. Овие микроорганизми потекнуваат од дигестивниот систем на кравите и произведуваат супстанции кои се присутни во воздухот во шталите. Со вдишувањето тие доаѓаат во контакт со рецепторите во човечките дишни патишта и можат да влијаат врз воспалителните реакции на имунолошкиот систем.

На тој начин би можеле да придонесат за помал ризик од астма, поленска алергија, а делумно и од атопичен дерматитис. Истражувачите на тој начин успеале да поврзат низа чекори – од бактериите поврзани со кравите и средината во шталите, па сè до нивното дејство врз човечкиот имунолошки систем.

Откритието би можело да помогне во развојот на нови терапии

Резултатите не се важни само за разбирање на причините поради кои децата што растат во таква средина поретко развиваат одредени алергиски заболувања. Научниците се надеваат дека овие сознанија еден ден би можеле да помогнат и во развојот на нови превентивни или терапевтски пристапи.

Долгорочната цел е да се направи обид да се имитира природниот заштитен ефект од животот на фарма, без да биде потребно детето навистина да расте покрај добиток и во средина со штали.

До евентуалната примена на овие сознанија во медицината ќе бидат потребни дополнителни истражувања, но резултатите им овозможуваат на научниците поконкретен увид во механизмите што би можеле да стојат зад одамна познатата поврзаност меѓу растењето на земјоделски стопанства и помалиот ризик од алергии и астма.