Пресврт во разделбата на Дончиќ со поранешната свршеница: Ја повлекла тужбата, но сега бара 50 милиони долари – нови детали од драмата

Според „ТМЗ“, Анамарија покренала нова постапка во Словенија и наводно бара спогодба во вредност од вкупно 50 милиони долари.

„Извори директно запознаени со случајот наведуваат дека Анамарија поднела ново барање во Словенија и бара 40 милиони долари за себе. Се претпоставува дека преостанатите 10 милиони се наменети за нивните две ќерки“, пишува „ТМЗ“.

Американскиот портал додава дека Дончиќ претходно нагласил дека би направил сè за своите деца, поради што проценува дека делот од барањето што се однесува на неговите ќерки би можел да биде прифатлив, додека 40-те милиони долари наменети за Анамарија би можеле да претставуваат многу поголема пречка.

Според истиот извор, Анамарија бара и нова одлука за родителските права, со која времето што Дончиќ го поминува со своите ќерки би се намалило од два дена на еден.

„ЛА Тајмс“ претходно објави дека Анамарија, пред враќањето во Словенија, доставила документи до судот во Лос Анџелес со кои бара повлекување на барањето за алиментација. Како причина, таа ја навела својата желба да го реши прашањето „мирно и пријателски“, во најдобар интерес на нивните деца.

Сепак, според „ТМЗ“, се чини дека таков договор би можел да има многу висока цена.

Лука и Анамарија имаат две ќерки, двегодишната Габриела и седуммесечната Оливија. Тие беа заедно десет години, пред да ја раскинат свршувачката на почетокот од оваа година.

Дончиќ претходно тврдеше дека Калифорнија не е соодветно место за водење на постапката, бидејќи девојчињата живеат во Словенија. Тој исто така изјави дека во таа земја веќе покренал постапка поврзана со старателство и финансиска издршка.

Ѕвездата на Лос Анџелес Лејкерс моментално престојува во Словенија за да биде поблиску до своите ќерки. Во мај објави дека нема да игра за репрезентацијата ова лето, бидејќи сака да се посвети на борбата за заедничко старателство.

Според медиумите, Дончиќ ќе го искористи престојот во Словенија и за своите кошаркарски обврски. Наводно, на крајот од овој месец ќе организира четиридневен мини-камп за тимот на Лејкерс.

Дончиќ и Голтес важеа за еден од најпознатите словенечки парови повеќе од една деценија, потсетува порталот „Свет 24“. Нивната љубовна приказна започна во текот на летото 2011 година на островот Крк, каде што се запознале како тинејџери.

Заедно, тие поминаа низ годините врска на далечина, подемот на Дончиќ до статусот на една од најголемите кошаркарски ѕвезди, како и преселбата помеѓу Европа и САД. На крајот основаа семејство и добија две ќерки.

По повеќе од една деценија врска, се чинеше дека следниот чекор ќе биде венчавка. На 7 јули 2023 година, Дончиќ ја запроси Анамарија во Блед, а датумот на свршувачката не беше избран случајно. Запросувањето се случи на 7 јули, што беше симболична врска со бројот 77 што Дончиќ го носи на дресот.

Сепак, наместо свадба, следеше раскинувањето на свршувачката, а поранешната љубовна приказна на еден од најпознатите словенечки парови во последните месеци се претвори во правна битка околу децата и финансиите. По повлекувањето на постапката во Калифорнија, нејзиното ново продолжение, според американските медиуми, се очекува во Словенија.