„L’Equipe“: Кварацхелија е главен фаворит за „Златната топка“

Ѕвездата на Пари Сен Жермен зад себе има спектакуларна клупска сезона, во која, според многумина, беше еден од најдобрите, ако не и најдобриот играч на францускиот гигант. Кварацхелија го предводеше ПСЖ до освојување на Лигата на шампионите, како и до титулата шампион на Франција, а неговите настапи беа една од клучните причини за големиот успех на парискиот клуб.

Особено се издвојува фактот што Кварацхелија би можел да ја освои најпрестижната индивидуална награда во светскиот фудбал иако не настапи на Светското првенство. Грузиецот има можност да стане првиот играч во модерната ера, по Кевин Киган, кому ќе му успее такво нешто.

Кварацхелија за време на одморот по завршувањето на сезоната следеше посебна индивидуална тренинг-програма, а на подготовките на ПСЖ се врати во одлична физичка форма. Неговата цел е јасна – да продолжи да освојува трофеи и да ја нападне „Златната топка“.

Меѓу главните кандидати за наградата се споменуваат и Ламин Јамал, Родри, Лионел Меси, Усман Дембеле, Хари Кејн и Килијан Мбапе. Сепак, за секој од нив постојат одредени аргументи поради кои можеби нема да биде конечниот избор.

Токму затоа насловната страница на „L’Equipe“ привлече големо внимание, бидејќи францускиот весник реши предност да му даде на Кварацхелија пред бројни големи фудбалски имиња.

Јубилејната, 70. церемонија на доделувањето на „Златната топка“ ќе се одржи на 26 октомври 2026 година. Организатор е „France Football“, магазинот кој, како и „L’Equipe“, е во сопственост на истата медиумска групација, што дополнително го зголемува вниманието што го предизвика нивната проценка за овогодишната трка за најпрестижната индивидуална награда во светскиот фудбал.