Турскиот актер Бурак Озчивит, кого публиката го памети како легендарниот Бали-бег од серијата „Сулејман Величествениот“, со години важеше за еден од најпосакуваните мажи на малите екрани. Неговиот изглед и харизма освоија милиони обожавателки, но најновите фотографии од летувањето покажуваат дека и еден од најголемите телевизиски заводници со текот на времето се менува.
Папараците го снимиле актерот за време на одморот со семејството додека безгрижно уживал на плажа и си играл со своите деца. Токму тие опуштени семејни моменти го привлекоа вниманието, но многумина забележале дека Озчивит повеќе ја нема извајаната фигура по која беше познат во екот на својата слава.
На фотографиите се гледа дека актерот добил неколку килограми и дека неговиот стомак е поизразен од порано. Сепак, се чини дека тоа воопшто не го оптоварува и без двоумење ужива во семејниот одмор со сопругата Фахрије Евџен и нивните синови.
Неговиот нов изглед набргу стана тема на дискусии на социјалните мрежи. Додека поединечни корисници оставаа коментари со поддршка, други беа значително покритични и го споредуваа неговиот денешен изглед со оној од периодот на неговата најголема популарност. „Дали е можно тоа да е тој?“, „Баш многу се променил“, „И тој е само човек“, „Нормално е за човек што е во брак и има деца“, беа дел од коментарите.
Да потсетиме, Бурак и Фахрије се запознале во 2013 година на снимањето на серија, а во брак се од 2017 година. Веќе со години важат за еден од најпознатите и најследени брачни парови на турската јавна сцена. Нивните семејни фотографии редовно го привлекуваат вниманието на милиони обожаватели, а секое нивно јавно појавување предизвикува бројни реакции.
Без оглед на бројните коментари, многу обожаватели сметаат дека Озчивит, познат по дисциплинираниот начин на живот и тренинзите, многу брзо ќе се врати во препознатливата форма пред почетокот на своите нови актерски проекти.
