Сè поради Меси: Овој луксузен телефон чини вистинско богатство

До следниот голем настан „Galaxy Unpacked“ на „Samsung“ остануваат помалку од два дена, но тоа не ја спречи познатата компанија „Caviar“, која изработува луксузни верзии на технолошки уреди, да пушти во продажба специјален „Galaxy Z Fold 8 Ultra“ посветен на Лионел Меси – и тоа речиси една недела пред официјалната премиера.

Доколку го посакувате овој модел, ќе мора сериозно да заштедите, бидејќи неговата цена изнесува неверојатни 13.130 долари.

Телефонот, опишан како омаж на легендарниот фудбалер, е украсен со рачно изработен емајл со ликот на Меси во традиционалните бои на репрезентацијата на Аргентина, како и со детали од 24-каратно злато. „Caviar“ на куќиштето го вклучи дури и грбот на „FIFA“, кој потсетува на освојувањето на Светското првенство во 2022 година, официјалниот грб на фудбалскиот сојуз, како и логото на брендот „Adidas“. Телефонот пристигнува во луксузно кралско-сина амбалажа, секако со дополнителна позлата и персонализиран клуч на „Caviar“.

Серијата е исклучително ексклузивна и ќе биде ограничена на само 19 примероци во светот.

Ако се земе предвид дека телефонот сè уште не е официјално лансиран, и натаму се очекуваат редовните цени на „Samsung“ за „Galaxy Z Fold 8 Ultra“. Сепак, ако се суди според неговиот претходник, кој на пазарот се појави со почетна цена од околу 2.000 долари, оваа верзија на „Caviar“ чини дури пет пати повеќе од стандардниот модел.

За жал, спецификациите на самиот хардвер не се подетално откриени, па за целосните технички информации ќе мора да се почека официјалниот настан „Galaxy Unpacked“, кој ќе се одржи во вторник, 22 јули.

Сепак, доколку сте планирале да издвоите огромна сума за да бидете меѓу првите во светот што ќе го поседуваат новиот „Samsung“, имајте предвид една работа – од компанијата „Caviar“ нагласуваат дека производството на телефонот започнува дури по уплатата на целиот износ, а рачната изработка со чисто злато и емајл сигурно ќе потрае.