Нарушеното лачење пот, силната исцрпеност и намаленото чувство на жед ги прават летните месеци исклучително тешки за оваа група пациенти. Сепак, лекарите предупредуваат дека терапијата во никој случај не смее да се прекинува на своја рака, туку е потребно да се применуваат соодветни мерки на претпазливост.

„Некои антидепресиви можат да влијаат врз начинот на кој телото ги регулира температурата и потењето, што значи дека одредени луѓе се поподложни на здравствени тегоби за време на топло време“, вели Викторија Корџиу Браун од британското здружение на лекари по општа медицина.

Меѓу најчестите симптоми се вртоглавица, мачнина, главоболка, замор и дехидратација.

Зошто антидепресивите ја зголемуваат чувствителноста на горештините?

„Човекот ја одржува својата внатрешна телесна температура со помош на сложен систем од физиолошки механизми, кои заеднички ги надоместуваат промените предизвикани од метаболизмот, физичкиот напор и влијанијата од околината. Нарушувањето на тој терморегулациски процес може да биде предизвикано од топлотен стрес, горештини или одредени лекови“, објаснува Михаел Паулцен за „Deutsche Welle (DW)“.

Меѓу тие лекови се и антидепресивите, на пример селективните инхибитори на повторното преземање на серотонинот, како што е сертралинот, како и трицикличните антидепресиви, како амитриптилинот. Тие влијаат врз хипоталамусот, дел од мозокот кој, меѓу другото, ја регулира телесната температура.

Последицата може да биде тоа што организмот повеќе не успева ефикасно да ја регулира температурата.

Тоа може да доведе до:

• мускулни грчеви,

• губење на свеста,

• топлотна исцрпеност,

• топлотен удар.

Антидепресивите можат да го намалат и чувството на жед, иако на организмот и понатаму му е потребна доволна количина течности. Покрај тоа, кожата може да стане почувствителна на оштетувања предизвикани од сонцето.

„Некои од овие лекови му отежнуваат на телото да остане разладено и хидрирано, па затоа е важно да се пие доволно вода и да се избегнува изложување на горештини. Дехидратацијата може да биде особено проблематична, бидејќи тогаш организмот може посилно да реагира на дејството на одредени лекови“, вели Даниел Харвуд од британското здружение на психијатри.

Дали сертралинот предизвикува засилено потење?

Земањето сертралин може значително да го отежне поднесувањето на летните горештини. Корисниците опишуваат интензивно, речиси неподносливо чувство на прегревање, како и прекумерно и неконтролирано потење, кое може сериозно да го попречи извршувањето на секојдневните активности, без оглед на обидите за разладување.

За овие појави постојат јасни медицински објаснувања.

„Трицикличните антидепресиви, како амитриптилинот, можат да го намалат потењето и со тоа да го отежнат разладувањето на телото преку испарување. Од друга страна, некои други антидепресиви можат да го зголемат потењето преку засилување на активноста на симпатичкиот, односно активирачкиот дел од автономниот нервен систем“, објаснува Паулцен.

Според искуствата на корисниците, сертралинот е особено познат по тоа што може да предизвика обилно потење, додека трицикличните антидепресиви можат да го намалат потењето и на тој начин дополнително да го отежнат ладењето на организмот.

Не ја прекинувајте терапијата на своја рака

Најважното правило е никогаш самостојно да не ја прекинувате терапијата, ниту да ја менувате дозата без претходна консултација со лекар.

„Наглото прекинување на антидепресивите може да предизвика симптоми на одвикнување и негативно да влијае врз физичкото и менталното здравје. Го препорачуваме истото што вообичаено го советуваме за време на големи горештини: да се внесуваат многу течности и да се избегнува директно изложување на сонце“, вели Корџиу Браун.

Паулцен додава дека, со почитување на овие мерки на претпазливост, терапијата најчесто може да продолжи без зголемен ризик од несакани ефекти.

Сепак, доколку се појават сериозни физички тегоби или нови и непознати психички симптоми, неопходно е да се побара помош од лекар или психотерапевт.