Неврологот д-р Бајбинг Чен предупредува дека додатоците во исхраната најверојатно не се најдоброто решение за зачувување на здравјето на мозокот. Тој истакнува дека заштитата на мозокот и намалувањето на ризикот од деменција многу повеќе зависат од секојдневните навики, отколку од таблетите. Дополнително нагласува дека за поголемиот дел од здравите луѓе не постојат цврсти научни докази дека ваквите додатоци го подобруваат помнењето или спречуваат деменција.
Според него, додатоците за здравје на мозокот се „преценети“.
„Индустријата за додатоци во исхраната за здравје на мозокот е една од најпреценетите. Би бил многу скептичен кон секој додаток што тврди дека може да спречи деменција или да го подобри помнењето. Треба да имаме предвид дека станува збор за индустрија вредна милијарди долари“, изјави тој во видео.
Тој додаде:
„Но, за повеќето здрави луѓе, доказите што стојат зад многу од таканаречените ’засилувачи‘ на работата на мозокот се изненадувачки слаби.“
Што препорачува наместо додатоци во исхраната?
Сепак, неврологот нагласува дека додатоците во исхраната се корисни кога постои реален недостаток на хранливи материи.
„Доколку ви е дијагностициран недостаток на некој нутриент, како што е витаминот Б12, неговото надоместување може да ја подобри невролошката функција. Но, тоа претставува лекување на конкретен здравствен проблем, а не доказ дека сите треба да го земаат истиот додаток за здравје на мозокот“, објасни тој.
Во описот на видеото порача:
„Вашиот мозок заслужува нешто подобро од маркетинг.“
Наместо да се потпирате на додатоци во исхраната, тој препорачува редовна физичка активност, квалитетен сон, контрола на крвниот притисок, одржување на социјални контакти, лекување на губењето на слухот, како и активности што ја стимулираат работата на мозокот, како што се учење странски јазик, свирење музички инструмент или танцување.
„Знам дека ништо од ова не е толку привлечно ниту едноставно како шишенце што ветува поостар ум. Но, ако вашата цел е долгорочна заштита на мозокот, овие навики имаат далеку посилни научни докази зад себе отколку повеќето додатоци што ќе ги видите во интернет-рекламите“, истакна тој.
Неговите препораки ги поткрепува и извештајот, објавен во 2024 година во списанието „The Lancet“, според кој околу 45 проценти од случаите на деменција би можеле да се спречат со промени во животниот стил.
Слични препораки дава и британската „NHS“, која ја нагласува важноста на здравата исхрана, редовната физичка активност, одржувањето здрава телесна тежина, престанокот со пушење, ограничувањето на консумирањето алкохол, контролата на крвниот притисок и избегнувањето на социјалната изолација.
