Фудбалскиот клуб Манчестер Јунајтед ја откри локацијата на планираниот стадион со капацитет од 100.000 гледачи, кој ќе се наоѓа на приближно 350 метри северозападно од „Олд Трафорд“, а клубот најави дека ќе ја разгледа можноста за продажба на правата за името на новиот стадион.
Минатиот месец клубот од Премиер лигата купи земјиште од 25 хектари за изградба на новиот стадион, а дел од таа локација во моментов е зафатен со картинг-патека.
Манчестерскиот клуб го претстави идниот проект, кој е дел од поширокиот план за обнова на просторот околу „Олд Трафорд“, а новата урбана целина ќе го носи името "Trafford Wharfside", пренесува „BBC“.
„Во следните неколку недели ќе работиме на дизајнот на стадионот. Се надеваме дека ќе можеме да претставиме нешто до крајот на оваа календарска година или на почетокот на следната“, изјави Колет Рош, извршна директорка задолжена за развојот на новиот стадион во Манчестер Јунајтед.
На прашањето кога би можел да биде отворен стадионот, Рош одговори:
„Нема да одредуваме конкретен датум. Сакаме сè да биде направено како што треба.“
Манчестер Јунајтед соопшти дека сè уште не е донесена одлука за иднината на сегашниот „Олд Трафорд“.
Проектот за развој на "Trafford Wharfside" предвидува изградба на нова населба со 15.000 станбени единици, а се проценува дека ќе отвори околу 48.000 нови работни места во локалната заедница.
Рош изјави дека во моментов не може да зборува за цената на проектот, но истакна дека постои голем интерес за учество во неговата реализација.
„Не можеме да зборуваме за цената. Во овој момент не можам да дадам конечна проценка. Најпрво мора да го завршиме процесот на проектирање. Не би било корисно сега да изнесуваме произволна бројка.
На располагање имаме различни модели на финансирање. Можеме да користиме задолжување, сопствен капитал, издавање акции или да вклучиме други инвеститори“, рече таа.
Таа нагласи дека за изградбата на стадионот нема да се користат јавни средства.
„Како фудбалски клуб мораме да стоиме на сопствени нозе. Стадионот мора сами да го финансираме од повеќе причини.
Сепак, овој проект е многу поголем од самиот стадион. Не можеме да ја финансираме изградбата на нова железничка станица или друга инфраструктура. Нашите средства ќе бидат насочени исклучиво кон стадионот“, додаде Рош.
Манчестер Јунајтед ќе ја разгледа можноста за продажба на правата за името на новиот стадион, во рамките на, како што наведуваат, „пристап заснован на разум, а не на суета“, кога станува збор за проект вреден две милијарди фунти.
„Од самиот почеток јасно кажувавме дека ова мора да биде проект воден од здрав разум, а не од суета.
Не знам како на крајот ќе се вика стадионот, но отворено кажавме дека ќе ја разгледаме можноста за продажба на правата за неговото име.
Тоа претставува важен извор на приходи и за тоа веќе разговаравме со нашиот Советодавен одбор на навивачи“, изјави Рош.
„На сите им е јасно дека е исклучително важно цените на билетите да останат достапни за навивачите. За да го овозможиме тоа, мора да обезбедиме дополнителни извори на приходи.
Сите истакнуваа дека изградбата на нов стадион ќе биде исклучително скапа“, заклучи Рош.
