Со децении е присутна на јавната сцена, а тоа со себе носи и обврска секогаш да изгледа добро и негувано, на што Пенелопе целосно се посветила.

Актерката редовно тренира и се храни здраво, но за разлика од диетите и менијата на многу ѕвезди, кои знаат да бидат комплицирани и исполнети со намирници што „обичните“ луѓе ретко ги јадат, Пенелопе Круз негува едноставен пристап кон исхраната.

Таа се фокусира на консумирање храна што ѝ дава чувство на благосостојба. Но, тоа не значи дека одредена храна ја смета за лоша, туку само за помалку здрава.

Се потпира на својата самоконтрола и се придржува до строга медитеранска исхрана.

Тоа значи дека јаде многу немасни протеини, интегрални житарки, свеж зеленчук и јаткасти плодови. Секогаш кога може, во своите рецепти користи и големи количини свежо авокадо и екстра девствено маслиново масло.

Во текот на денот се труди секогаш да пие доволно вода за да остане хидрирана.

Како изгледа менито на Пенелопе Круз?

Појадок

Сè зависи од тоа дали актерката работи, па појадува надвор или е дома. Ако јаде надвор, се труди појадокот да биде едноставен, па избира јајца и сланина. Ваков оброк, богат со протеини и со малку јаглехидрати, ѝ дава енергија и ѝ помага правилно да го започне денот.

Кога е дома и има малку повеќе време, со задоволство подготвува поразновиден појадок. Така, понекогаш тоа е англиски мафин без глутен со авокадо и поширани јајца одозгора, а понекогаш грчки јогурт со сезонско свежо овошје и малку мед.

Ручек

За ручек Пенелопе се труди да јаде храна со малку масти. Често јаде голема салата со динстана или печена риба и сезонски зеленчук. Ако сака пообилен оброк, тогаш избира ориз, киноа и други интегрални житарки во комбинација со динстан зеленчук, хумус или грав.

Ако е во движење и нема многу време за подготовка на храна, тогаш се одлучува за хумус и стапчиња од зеленчук. При изборот на намирници нема ограничувања, освен што избегнува премногу преработена храна.

Вечера

Што се однесува до вечерата, медитеранската исхрана дозволува речиси сè што е свежо. Не поттикнува консумирање многу црвено месо, но актерката не се плаши повремено да ужива во бифтек.

Исто така, сака со своето омилено јадење од ориз и грав да комбинира риба, јагнешко месо или некое немасно парче црвено месо.

Дури ѝ е дозволено одвреме-навреме да испие и малку вино со вечерата. Сè се сведува на умереност.

Ужина

Кај Пенелопе Круз, гладувањето не доаѓа предвид. Затоа, кога ќе почувствува глад меѓу оброците, избира „грицки“ што остануваат верни на медитеранската исхрана.

Често посегнува по јаткасти плодови, како цели бадеми или кикиритки, а желбата за благо ја задоволува со свежо овошје наместо со преработени енергетски плочки.

Така и понатаму внесува многу хранливи материи и протеини, но без дополнителните состојки што ги содржат готовите производи од продавниците.

Која храна ја избегнува?

Иако Пенелопе се придржува до медитеранската исхрана, таа следи малку построги правила отколку што самата исхрана бара.

Избегнува да консумира глутен и алкохол. Исто така, избегнува да јаде месо од животни што не се органски одгледувани.