Иако се повлече од професионалниот тенис пред неколку години, Федерер покажа дека љубовта кон спортот сè уште трае. Наместо да ги напушти трибините, тој останал да ги следи натпреварите до самиот крај, што многумина го протолкуваа како знак на почит кон играчите и кон турнирот што одбележа голем дел од неговата кариера.

Ден во друштво на познати личности

Федерер беше поканет на целодневно следење на натпреварите од претседателот на „All England Club“, а во кралската ложа тој ден седеа бројни познати гости. Меѓу нив беа возачот на Формула 1 Андреа Кими Антонели, актерите Џејмс Нортон, Џејсон Флеминг и Дејвид Хервуд, Пипа и Керол Мидлтон, комичарот Лени Хенри, како и тениската легенда Били Џин Кинг.

Од трибините ги следеа дуелите во кои настапија Григор Димитров, Артур Фери, Александер Зверев и Јиржи Лехечка.

Гест што ги освои обожавателите

Фотографијата од Федерер како сам седи во кралската ложа брзо се прошири на социјалните мрежи. Многумина истакнаа дека неговиот потег покажува колку го цени тенисот, дури и сега кога повеќе не е дел од професионалната турнеја.

„Очигледно е единствениот што дошол да гледа тенис. Легенда“, напиша еден корисник на „X“.

„Најдобрата фотографија од турнирот“, додаде друг.

„Сите си заминаа, а остана Федерер. Од почит кон играчите и кон самата игра“.

Трет коментираше: „Олицетворение на класата. Тешко е да се опише колку му се восхитувам“.

Еден од обожавателите заклучи дека односот на Федерер кон тенисот ги надминува резултатите и трофеите: „Вистинската почит се гледа кога нема камери и кога никој не ве гледа“.

Кралот на Вимблдон

Федерер е еден од најголемите играчи во историјата на Вимблдон. На тревнатите терени на „All England Club“ освои рекордни осум титули, а особено се памети неговото епско финале против Рафаел Надал во 2008 година, кое често се наведува како еден од најдобрите натпревари во историјата на тенисот.