Иако јавната свест за измамите со враќање на километражата постојано расте, многу возачи и понатаму плаќаат прескапо за автомобили чија километража вештачки е намалена. На локалниот пазар, каде што голем дел од возилата се увезуваат од странство, манипулациите со километражата не се реткост, особено кај автомобили постари од десет години, предупредуваат експертите.

Сепак, имајќи ја предвид финансиската состојба на поголемиот дел од граѓаните, малкумина можат да си дозволат да издвојат поголема сума за нов автомобил. Затоа, најголем дел од купувачите се насочуваат кон половни автомобили до 10.000 евра.

„VW Golf“ седма генерација

„VW Golf“ од седмата генерација е еден од најдобрите автомобили што може да се купат за помалку од 10.000 евра, особено ако не ви пречи поголема километража.

Станува збор за модерен автомобил со квалитетен ентериер и добри возни карактеристики.

Најразумен избор е 1.4 TSI бензинскиот мотор по редизајнот, кој повеќе не страда од основните проблеми што ги имаа постарите верзии. Од друга страна, 2.0 TDI дизел моторот нуди одличен компромис меѓу перформансите и потрошувачката.

„Mazda 6“ втора генерација

„Mazda 6“ од втората генерација е половен автомобил од средната класа кој нуди многу добар баланс помеѓу возните карактеристики, удобноста и доверливоста.

Најдобар избор се бензинските мотори од серијата MZR, особено 2.0 со околу 147 коњски сили или помоќниот 2.5 MZR, кои се механички издржливи и можат да издржат голема километража доколку редовно се одржуваат.

Дизел моторите 2.0 и 2.2 MZR CD нудат пониска потрошувачка на гориво, но бараат редовно и навремено сервисирање.

При купување задолжително проверете ја состојбата на каросеријата, бидејќи постарите примероци може да имаат проблеми со корозија.

Долг работен век

„BMW“ Серија 3 (F30)

„BMW“ Серија 3 од генерацијата F30 веќе може да се најде во овој ценовен ранг, особено ако има поголема километража.

Станува збор за модерен автомобил со одлични возни својства и квалитетен ентериер.

Најразумен избор се дизел верзиите 318 d или 320 d со рачен менувач, кои нудат одличен баланс меѓу динамиката и потрошувачката.

Бензинските верзии се порафинирани, но имаат повисоки трошоци за гориво.

При купување клучно е да се проверат сервисната историја, состојбата на разводниот механизам и потпирањето, пишува „Auto Klub“.

„Honda Accord“

„Honda Accord“ е еден од најдоверливите половни автомобили од средната класа.

Бензинскиот мотор 2.0 i-VTEC е механички многу издржлив и, со редовно одржување, може без проблем да издржи многу голема километража.

Помоќниот 2.4 мотор нуди подобри перформанси, а исто така има долг работен век доколку правилно се сервисира.

Дизел моторот 2.2 i-DTEC е моќен, но неговото одржување може да биде поскапо во споредба со конкуренцијата.

„Honda Accord“ се издвојува со квалитетно потпирање, цврста каросерија, прецизно управување и добро изработен ентериер, што го прави одлична долгорочна инвестиција.

„Volvo S60“ втора генерација

„Volvo S60“ од втората генерација нуди премиум карактер по цена на обичен половен автомобил.

Дизел моторите D3 и D4 се најразумен избор кога станува збор за потрошувачката и доверливоста.

Бензинските верзии T5 нудат значително подобри перформанси, но и повисоки трошоци за користење.

„Volvo S60“ импресионира со удобно потпирање, високо ниво на безбедност и квалитетен ентериер.

При купување задолжително проверете ја состојбата на автоматскиот менувач, потпирањето и сервисната историја, особено кај увезените автомобили.