Од тој момент јавноста со огромен интерес ја следи секоја вест за неговата состојба, но неговата сопруга Ема Хеминг Вилис сега одлучила да проговори за најголемата заблуда што обожавателите ја имаат за борбата на актерот.

Гостувајќи во поткастот „Bossticks“, 47-годишната Ема отворено објаснила дека фронтотемпоралната деменција не мора нужно да влијае врз помнењето на начинот на кој повеќето луѓе мислат.

„Тој се сеќава која сум јас, бидејќи нема Алцхајмерова болест“

„Мислам дека е многу честа заблуда дека, кога ќе помислиме на деменција, веднаш помислуваме на губење на помнењето“, истакнала Ема, објаснувајќи дека оваа тешка болест има три различни варијанти.

„Онаа што ја има Брус влијае врз говорот. Но постои уште една варијанта што влијае врз однесувањето и уште една што може да влијае врз движењето. Тоа е друг дел од мозокот. Значи, кога луѓето велат: ’О, дали се сеќава која си ти?‘, мојот одговор е: да, се сеќава, бидејќи нема Алцхајмерова болест, има ФТД“, објаснила сопругата на славниот актер.

Иако Алцхајмеровата болест е најчестиот облик на деменција воопшто, Ема напоменала дека ФТД всушност е најчестиот облик на деменција кај лицата помлади од 60 години.

Бракот со 71-годишната акциска ѕвезда, со која ги има ќерките Мејбел (14) и Евелин (12), ја претвори Ема во активна застапничка за подигнување на свеста за оваа болест. Сепак, улогата на негувателка носи и огромен емоционален товар, кој таа го опишала како „двосмислена загуба“.

„Тоа значи дека мора да тагувате по некој кој е жив, бидејќи физички е тука, но можеби не е ментално или емоционално“, искрено рекла поранешната манекенка, додавајќи дека сите облици на деменција „земаат и земаат и земаат, понекогаш многу бавно“.

„Постојано тагуваш. Дури сега научив како да се носам со тоа. Можеби во овој момент малку повеќе се навикнав на тоа отколку што на почетокот. Но, да, едноставно седиш со тоа и се движиш заедно со тоа“, признала Ема.

За болеста на татко ѝ неодамна во поткастот „The Inside Edit“ проговорила и неговата најстара ќерка Румер (37), која Брус ја има од бракот со Деми Мур, заедно со ќерките Скаут и Талула. Румер открила колку ѝ значи тоа што нејзината тригодишна ќерка Луета успеала да го запознае својот дедо, но и како болеста го променила.

„Многу сум благодарна што можам да го видам, иако нашето заедничко време сега е поинакво. Постои таа некоја нежност. Отсекогаш беше некаков мачо тип, а сега постои таква … кршливост не е вистинскиот збор, но едноставно, како, нежност што можеби, знаете, Брус Вилис, бидејќи е тоа што е, порано можеби не би ја дозволил на одреден начин“, изјавила Румер.

Брус Вилис, чија кариера опфаќа легендарни блокбастери како „Армагедон“, „Петтиот елемент“ и „Шесто сетило“, целосно се повлече од јавниот живот, но неговото семејство продолжува храбро да ја користи својата платформа за да им даде поддршка на сите кои минуваат низ истата борба.