„На деца од 7 години не им даваме марихуана, но им даваме еден друг токсин, многу поштетен“: Д-р Драган Иванов предупредува на штетна навика која го уништува здравјето

Д-р Иванов откри некои основни правила кои треба да ги почитуваме ако сакаме здрав и долг живот и спомена што е особено опасно за децата, а е често застапено.

„Навечер треба да си легнеме навреме. Особено децата и младите во пубертет. Важно е да легнат пред 22, 23 часот. Кога навреме ќе легнеме, ќе се наспиеме, ќе се синтетизира мелатонин и тој заедно со хормонот на раст ќе го регенерира нашиот мозок и целиот организам“, објаснува д-р Иванов и додава:

„Наутро, штом станеме, треба да го вклучиме мозокот. Како? Така што ќе му дадеме енергија. Најдобар извор на енергија за нашиот мозок и целиот организам се медот и овошјето. Нашиот мозок работи исклучиво на глукоза. Затоа децата не треба да одат на училиште, ниту ние да почнуваме што било да работиме без претходно да внесеме природни, непреработени јаглехидрати кои се наоѓаат во медот, овошјето и интегралните житарки“.

Појадокот, значи, не го прескокнуваме, а на работа, вели овој професор, треба да одиме со велосипед или пеш.

„Можеби ќе изгубиме малку повеќе време, но со тоа вршиме две работи. Одиме на работа, а истовремено се рекреираме и престојуваме на сонце. Ако работиме седечка работа, треба да бидеме свесни дека по 3-4 часа седење, 80% од мозокот се инхибира – се исклучува. Треба да го прекинеме тоа седење и гледање во екран или документи и да се размрдаме 5-10 минути. Така мозокот повторно ќе се активира и сите тие задачи ќе ги извршиме поефикасно“, истакнува овој доктор.

Тој вели дека е многу важно секој ден да најдеме време за физичка активност која ќе трае од 45 до 60 минути, но и за престој на сонце. Идеално време, вели тој, е кога сонцето изгрева и кога заоѓа.

„Тогаш сонцето е во нашето видно поле, ќе се синтетизира витамин Д, но уште поважно, мелатонин и серотонин“, објаснува д-р Иванов.

Кога ќе дојде време за ручек, најдобро е да избереме мешунки, а вечерата, истакнува докторот, да ја прескокнеме.

Тој се осврна и на темата на емоциите за кои тврди дека можат да бидат токсични како високиот холестерол и чадот од тутун.

„Изолацијата и осаменоста, неспретноста во комуникацијата со другите луѓе, се потоксични за нашето здравје од чадот од тутун. На деца од 7 години нема да им дадеме марихуана, но им даваме еден друг токсин кој е поопасен од марихуаната. А тоа е прекумерната употреба на електронски уреди и социјални мрежи. Тоа за децата е потоксично од пушењето марихуана“, тврди д-р Иванов.

Како што вели, јасно е дека мораме да ја користиме таа технологија, но за тоа треба да одвоиме еден дел од денот, а потоа и пред тоа да ги оставиме уредите и да му посветиме внимание на она што е најважно. А тоа се другите луѓе.

„Ние од односите со другите луѓе црпиме најмногу среќа и животна радост“, заклучи овој доктор.