Најчесто се верува дека редовното ѓубрење е најважно за бујно цветање и здрав раст на растенијата, што не е добра вест за оние што не сакаат многу време да поминуваат околу цвеќето, но уживаат да бидат опкружени со нивните прекрасни бои и мириси.

Сепак, постојат видови на кои дополнителното прихранување всушност не им е потребно, а понекогаш, згора на тоа, може и да им наштети!

Повеќето такви видови растенија потекнуваат од подрачја со сиромашна, каменеста или песоклива почва, па со текот на времето се приспособиле на услови во кои нема многу хранливи материи. Доколку таквите растенија се ѓубрат премногу, најчесто се случува да развиваат многу лисја, но помалку цветови, додека стеблата слабеат и можат да „паднат“ и да делуваат безживотно.

Затоа, ако сакате градина што бара помалку одржување, а изгледа раскошно, овие растенија слободно оставете ги да растат без дополнително прихранување. Доволно е да им обезбедите соодветни услови и повремено да ја збогатите почвата со компост (кој можете и сами да го направите).

Растенија што не треба да се ѓубрат

1. Лаванда - Оваа медитеранска убавица најдобро успева на сиромашна и добро дренирана почва, а премногу ѓубриво може да го намали цветањето.

2. Жалфија - Отпорна е на суша и навикната на скромни услови, па дополнително прихранување најчесто не ѝ е потребно.

3. Крокосмија - Ова растение расте од кртола и складира доволно енергија за сезоната на раст и цветање без дополнително ѓубрење.

4. Јапонска анемона - На оваа повеќегодишна убавица, која сигурно цвета од година во година, не ѝ е потребно прихранување за да успева.

5. Ехинацеа - Ова растение, кое долго време се користело како народен лек, е познато по својата издржливост, а често подобро напредува кога не се прихранува со вештачки ѓубрива.

6. Седум - Ова сукулентно повеќегодишно растение претпочита сиромашна почва и не сака премногу хранливи материи.

7. Декоративни треви - Повеќето видови развиваат поубава форма и поцврсти стебла кога растат без дополнително ѓубрење.

8. Лажно индиго - Ова долговечно растение, познато и како Baptisia, одлично напредува во почва што не е богата со хранливи материи.

9. Морска зеленика - Најубаво цвета на сиромашни и добро дренирани површини.

10. Каранфил - Премногу ѓубриво го поттикнува растот на лисјата на сметка на цветовите, па умереноста е неговиот најдобар сојузник.