Затоа овојпат ви го носиме рецептот за Фар Бретон, традиционален француски колач со едноставна подготовка и богат вкус, кој за миг ќе ве однесе во срцето на Бретања.

Називот „фар“ потекнува од латинскиот збор „far“ или „farrum“, што значи пченица или зрно. Во почетокот тоа било многу едноставно јадење од брашно, млеко и јајца, состојки што биле достапни речиси за секого, пишува „Punkufer.hr“.

Во традиционалната верзија, Фар Бретон се прави од јајца, млеко, брашно, шеќер и путер, а негов карактеристичен додаток се сувите сливи. Пред печење, најчесто се потопуваат во вода, чај или алкохол за да омекнат. По печењето, колачот добива златна кора, додека внатрешноста останува мека, кремаста и донекаде наликува на печен крем.

Со текот на времето се појавиле бројни варијации на овој класик. Сувите сливи често се заменуваат со цреши, вишни, круши или друго сезонско овошје, а во некои рецепти се додава и малку рум. Особено се популарни летните верзии со вишни, кои совршено се вклопуваат со нежната текстура на колачот. Може да се послужи топол или целосно изладен, а токму неговата едноставност е причината поради која опстанал со векови. Еве го рецептот:

Потребни состојки:

- 300 гр. вишни без семки
- 4 јајца
- 125 гр. шеќер
- 125 гр. меко брашно
- прстофат сол
- 50 гр. путер, растопен
- 50 мл. ладно млеко
- 25 мл. темен рум

Подготовка:

Загрејте ја рерната на 200°C (180°C со вентилатор). Малку подмачкајте огноотпорен сад со зафатнина од 1 литар. Наредете ги вишните на дното од подготвениот сад.

Во сад изматете ги јајцата и шеќерот со жица додека смесата не стане лесна и кремаста. Просејте ги брашното и солта и добро измешајте за да добиете мазна смеса без грутки. Додадете ги растопениот путер, млекото и румот и повторно измешајте додека смесата не стане хомогена.

Прелијте ја смесата врз вишните и ставете ја во рерна. Печете 10 минути, потоа намалете ја температурата на 170°C (150°C со вентилатор) и продолжете со печење уште 20 минути, или додека смесата не се стегне и површината не порумени. Извадете од рерна и оставете да се излади на собна температура.

Послужете со шлаг, по желба. На здравје!