Иако ова тврдење е предмет на расправа, факт е дека постојат одредени човечки вештини што технологијата во догледно време нема да може да ги замени. Токму тие вештини во иднина ќе бидат пресудни и ќе им помогнат на децата да се истакнат во свет со кој сè повеќе управува вештачката интелигенција, пишува Тајмс оф Индија.

Емоционална интелигенција

Вештачката интелигенција може да обработува зборови и да реагира на нив, но не може вистински да доживее емоции, поради што емоционалната интелигенција ќе остане една од највредните човечки особини.

Децата кои разбираат како да управуваат со сопствените чувства подобро се снаоѓаат во различни ситуации и градат поквалитетни односи со другите. Родителите можат да го поттикнат развојот на емоционалната интелигенција така што ќе ги охрабруваат децата да ги препознаваат и именуваат своите чувства, да ги почитуваат туѓите ставови и да им пристапуваат на конфликтите со емпатија.

Критичко размислување

Вештачката интелигенција може да понуди одговори на безброј прашања, но да се знае да се постават вистинските прашања е вештина што ќе станува сè поважна. Децата треба да научат да ги анализираат информациите, а не слепо да прифаќаат сè што ќе видат или слушнат.

Иднината ќе има потреба од поединци кои можат да размислуваат со своја глава, да препознаваат проблеми и да носат аргументирани одлуки. Дете кое ќе го совлада критичкото размислување нема да биде само обичен корисник на технологијата, туку ќе знае да ја користи мудро и со цел.

Приспособливост

Приспособливоста е способност за успешно снаоѓање во нови и непознати околности. Професиите и вештините што ќе им бидат потребни на децата во иднина би можеле да изгледаат сосема поинаку од денес. Приспособливоста како вештина подразбира подготвеност за грешки и што е најважно, учење од нив. Децата кои се подготвени да се обидуваат, да грешат и да истраат ќе станат посвесни за светот што постојано се менува околу нив.

Родителите можат да ја развиваат приспособливоста така што ќе ги изложуваат децата на нови предизвици. Без разлика дали станува збор за учење нова вештина, соочување со разочарување или приспособување на промени, таквите искуства градат отпорност.

Креативност

Вештачката интелигенција не може да фантазира, но луѓето можат. Имагинацијата ја поттикнува љубопитноста, буди емоции и создава искуства, а токму тие квалитети се во самата суштина на креативноста. Автентичната уметност, без разлика дали станува збор за музика, сликарство или пишување, може да произлезе исклучиво од човечката креативност.

Вистинската уметност настанува кога светот се гледа надвор од зададените рамки. Родителите имаат клучна улога во поттикнувањето на детската креативност. Кога на детето од најмала возраст ќе му се дозволи да ја истражува својата креативна страна, тоа почнува да размислува на нов и оригинален начин.

Самостојност

Иако технологијата станува сè поголем дел од нашите животи, децата и понатаму мора да научат сами да се снаоѓаат. Самодовербата, отпорноста и способноста за самостојно функционирање во секојдневието се основни животни вештини чија важност воопшто нема да избледи, без оглед на тоа колку технологијата ќе напредува.

Родителите можат да ја развиваат самостојноста така што ќе им даваат на децата одговорности соодветни на нивната возраст, наместо сè да прават наместо нив. Кога децата ќе добијат можност сами да се обидат да направат нешто, учат трпение, решавање проблеми и градат верба во сопствените способности.