Денес Мирка Федерер и Роџер Федерер важат за еден од најхармоничните и најстабилните парови во светот на спортот, а нивната приказна започнала сосема спонтано – за време на олимпискиот тениски турнир, кога и двајцата ги бранеле боите на Швајцарија.

Мирка Федерер (тогаш Вавринец) имала 21 година и веќе била професионална тенисерка, додека Роџер Федерер имал само 18 години и навестувал каква легенда ќе стане. И токму за време на Летните олимписки игри 2000 се родиле првите емоции меѓу нив двајца.

Федерер години подоцна во интервју за „Guardian“ откри детали за нивниот прв бакнеж, а тие детали и денес се прераскажуваат.

„Кога првпат ја бакнав, таа ми рече: ‘Толку си млад’. А јас ѝ одговорив: ‘Па имам речиси 18 и пол години’. Знаете кога се обидувате да ја додадете таа половина година за да звучите постаро? А таа ми рече: ‘Добро, ти сè уште си бебе!’“, раскажал Роџер низ смеа.

Првиот впечаток за Роџер Федерер: „Што не е во ред со него?“

Интересно е што првиот впечаток што Мирка Федерер го имала за својот иден сопруг не бил особено романтичен. Пред да се запознаат на Игрите, таа го гледала на еден турнир во Швајцарија, каде што младиот Роџер Федерер во налет на бес го фрлил рекетот.

„Сите ми велеа: ‘Оди да го видиш тоа момче, неверојатно е талентиран, иднината на тенисот’. А првото што го виде беше како го фрлам рекетот и викам по теренот. Помислила: ‘Да, изгледа како одличен играч, но што не е во ред со ова момче?’“, се присетил Роџер.

Сепак, за време на двете недели поминати заедно во Сиднеј целосно се зближиле.

„Поминавме две недели заедно и последниот ден, пред заминувањето дома, првпат се бакнавме“, рекол славниот тенисер во едно подоцнежно интервју.

Венчавка и два пара близнаци

Нивната љубовна приказна продолжила да расте паралелно со кариерата на Роџер Федерер. Мирка Федерер во 2002 година ја заврши професионалната тениска кариера поради повреда на стапалото, но останала покрај Роџер во сите најважни моменти од неговата спортска доминација.

Тие се венчаа во 2009 година во Швајцарија, на интимна церемонија на која присуствувале само семејството и најблиските пријатели. Истата година ги добија близначките Мила и Шарлин, а во 2014 година семејството се прошири со доаѓањето на уште еден пар близнаци – Лео и Лени.

Мирка беше и негова најголема поддршка и личност од најголема доверба. Со години патуваше со него низ светот, ги следеше неговите мечеви од ложата и му помагаше да ги организира деловните обврски и настапи.

Многу љубители на тенисот токму поради тоа сметаат дека нивната љубов е една од ретките искрени приказни во светот на спортот – но и во јавниот живот генерално. Додека Роџер Федерер освојуваше грен слем титули и соборуваше рекорди, Мирка Федерер беше константа во неговиот живот.

Освен по семејната хармонија, познати се и по хуманитарната работа. Уште во 2003 година ја основаа фондацијата „Roger Federer Foundation“, која помага во образованието на децата во сиромашните делови на светот, особено во Африка.