Италијанската одбојкарка Џорџа Занони во последните месеци сè почесто го привлекува вниманието на спортската јавност, но не само поради своите настапи на теренот. Многумина во Италија веќе ја нарекуваат една од најубавите спортистки во светот.
Таа ги брани боите на „Рома Волеј Клуб“ и настапува на позицијата либеро. Има 28 години, а својата сениорска кариера ја започна уште во 2013 година, кога дебитираше за тимот „Волеј Док Асти“.
Џорџа Занони пред две сезони беше избрана меѓу петте најдобри либера во италијанската „Serie A1“, со 42,1 проценти совршен прием и ефикасност од 0,32.
Во текот на кариерата освои бројни трофеи, а особено се издвојува триумфот во Лигата на шампионите со поранешниот клуб „Новара“. И покрај успесите на највисоко ниво, Занони реши да стане дел од проектот на „Рома Волеј Клуб“, кој има амбиции повторно да се врати во елитниот ранг на италијанската одбојка.
Моментално клубот се натпреварува во „Serie A2“, а искусното либеро игра важна улога во тимот.
Освен со своите одбојкарски квалитети, Занони привлекува огромно внимание и на социјалните мрежи, каде што има илјадници следбеници. Италијанските медиуми често пишуваат за нејзиниот стил, харизма и елегантен изглед, поради што многумина ја сметаат за една од најатрактивните спортистки во Европа.
Интересно е што таа е позната и по својата смиреност и професионален пристап, а во интервјуа често истакнува дека најважно ѝ е тимот да напредува и да се врати во врвот на италијанската одбојка.
Нема дилема дека Џорџа Занони станува сè поголемо име во светот на спортот – и поради игрите на теренот, и поради вниманието што го привлекува надвор од него.
