Патниците кои патуваат со компанијата „Ryanair“ се предупредени на една од најскапите грешки која може да ги чини и до 160 евра пред самиот лет. Станува збор за навидум безопасен пропуст кој лесно може да се избегне со внимателна проверка на податоците при резервирање на билет. Во желбата што побрзо да обезбедат поволен лет, поради ситната тастатура на телефонот или едноставна невнимателност, патниците често погрешно ги внесуваат името и презимето, а таквата грешка може скапо да ги чини.

Според информациите од веб-страницата на „Ryanair“, оваа такса важи и од април 2026 година. Покрај казната од 100 евра за пропуштен лет, меѓу најскапите трошоци што патниците можат да ги имаат се наоѓа токму промената на името на билетот.

Краток рок за бесплатни исправки

Ирскиот авиопревозник има многу строги правила кога станува збор за измена на лични податоци, а периодот во кој грешките можат да се поправат без дополнителни трошоци е прилично краток. Дополнително, постојат и посебни услови што патниците мора да ги исполнат.

„Ryanair“ наведува дека промените на името се дозволени за сите резервации. Целосна промена е можна онлајн до 24 часа пред полетување или на аеродром до два часа пред полетување, со надомест. Исправки како замена на букви во името или презимето во рок од 48 часа од резервацијата, или промена до три букви (еднаш), се бесплатни ако се направат до 48 часа пред поаѓање.

Колку може да чини грешката по истек на рокот

Патниците кои дури на аеродром ќе ја забележат грешката можат да се соочат со трошок и до 160 евра. Нискобуџетната компанија е позната по строга наплата на дополнителни трошоци, дури и кога станува збор за ненамерни грешки.

По истекот на 48 часа, промената на име чини околу 115 евра, додека преку агенција може да достигне и до 160 евра.

Дали понекогаш е поисплатливо да се купи нов билет

Правилата се разликуваат меѓу авиокомпаниите, па секогаш е препорачливо однапред да се провери дали се наплатуваат вакви исправки. Понекогаш е поисплатливо да се откаже постоечката резервација и да се купи нов билет, особено кај евтини летови.

Кога промената не се наплаќа?

„Ryanair“ наведува дека постојат исклучоци, како промена на презиме по склучување брак. Во тој случај, промената се врши бесплатно со приложување доказ (венчален лист).