Денвер Нагетс, во план имаат некои радикални промени во своите планови за претстојната сезона, тврди НБА инсајдерот Шамс Чаранија.
Раната елиминација на Денвер Нагетс од плејофот на НБА од десеткуваната Минесота покрена сериозни прашања за иднината на франшизата од Колорадо. И покрај доминацијата на Никола Јокиќ во претходните сезони, впечатокот е дека франшизата не успеа да го искористи максимално неговиот најдобар период.
Според информациите дадени од ESPN, кои ги презентираше Шамс Чаранија, во Денвер се подготвени за радикални потези – практично целиот состав би можел да биде на пазарот, со исклучок на Јокиќ, околу кого сакаат да изградат нов, поконкурентен тим.
„Првото нешто – тренерот Дејвид Аделман останува, неговата работа е безбедна. Второто нешто – Денвер сака да се обврзе долгорочно со Никола Јокиќ. Тој ќе може да потпише четиригодишно продолжување на договорот вредно повеќе од 290.000.000 долари во јули. Очекувањето е дека ќе го потпише во јули, кога ќе може, и тие ќе продолжат напред заедно“, рече Чаранија.
Сепак, најголемите промени се очекуваат во составот. Клубот планира темелна реконструкција и, како што е наведено, тие се подготвени да разгледаат понуди за сите играчи – дури и за Џамал Мареј, доколку се појави соодветна понуда.
„Ќе има големи промени во составот на Денвер. Тие активно ќе размислуваат како да го опкружат Никола Јокиќ со вистинските дополнувања во составот, така што овој тим повторно ќе атакува на врвот на НБА. Никола по поразот од Минесота рече дека тимот е далеку од врвот. Денвер ќе ги разгледува понудите за сите играчи, освен за Никола Јокиќ“, додаде инсајдерот.
Посебно внимание се обрнува на статусот на Арон Гордон, кој би можел да го напушти Денвер во текот на летото. Веќе постои голем интерес за искусниот крилен центар, а како потенцијални дестинации се споменуваат Лос Анџелес Лејкерс, Бостон Селтикс и Финикс Санс.
Иако Гордон беше важен дел од шампионската генерација и еден од клучните фактори во соблекувалната, честите повреди значително влијаеја на неговите перформанси. Во текот на оваа сезона, тој одигра само 36 натпревари, со просек од 16,2 поени, 5,8 скока и 2,7 асистенции.
Договорно, Гордон е врзан со Денвер уште две години, со значителна финансиска обврска, што дополнително ја комплицира ситуацијата во планирањето на идните потези.
Сè укажува дека Нагетс влегуваат во период на големи промени, со јасна цел – конечно да изградат тим околу Јокиќ способен да ја продолжи борбата за титулата.
