Барселона и сезонава остана без шанса да се бори за трофејот во Лигата на шампионите, а ваквиот епилог донесе и одредени критики за тренерот Ханси Флик.
Стилот на игра на Каталонците носи сериозен ризик, а полската легенда Јан Томашевски има и поинаква забелешка, поврзана со минутажата на неговиот сонародник Роберт Левандовски.
– Германскиот тренер во моментов се однесува кон Роберт Левандовски на ист начин како што се однесува кон целиот тим на Барселона.
– Тој не е способен да води тим од највисоко ниво во Европа и тоа го докажува секоја недела. Најпопуларниот Полјак во светот, човек кој требаше двапати да ја освои Златната топка, се третира како адут за пазарење. Роберт не го заслужува ова. Тој не го заслужува третманот што го добива во Барселона од својот тренер.
– Мора да признаете, господине Флик, дека ја упропастивте целата ситуација, исто како што направивте во германската репрезентација. Вашето време во Барса нема да заврши добро, – порачал Томашевски.
