Ситуацијата од индиската држава Гуџарат звучи како филмска приказна која успешно функционирала дури 18 месеци, пишува „Večernji list“.

Измамниците успеале да соберат околу 700.000 евра наплатувајќи нелегална патарина пред да бидат откриени, сè благодарение на лажна инфраструктура која совршено ја реплицирала „сцената“ на вистинска наплатна станица на автопат.

Планот бил осмислен до најситни детали, почнувајќи од самата зона на наплатните куќички. Организаторите го искористиле подрачјето на напуштена фабрика за керамика за да изградат објект кој совршено имитирал вистинска наплатна станица.

Бетонска конструкција, подвижни рампи, сигнализација, па дури и организацијата на сообраќајот... сè било дизајнирано така што возачите да поверуваат дека се движат по службен пат. Клучот бил и во цената. Лажната патарина чинела приближно половина од вистинската, што ги поттикнувало возачите да свртат кон оваа алтернатива.

Измамата одела подалеку од „сценските реквизити“ на инфраструктурата. Измамниците го оправдувале постоењето на наплатната станица тврдејќи дека приходите ќе бидат наменети за изградба на храмови во блиското место. Аргумент кој, во локалниот контекст, дополнително ја зајакнал веродостојноста на операцијата и со месеци спречувал сомнежи. Меѓутоа, измамата на крајот била откриена поради „ситница“.

Официјалниот автопат, оддалечен само неколку километри, забележал необично низок сообраќај. Тоа, секако, го привлекло вниманието на концесионерот. Властите почнале да ја истражуваат оваа аномалија и анализата на сателитските снимки открила постоење на неодобрена инфраструктура која пренасочувала голем дел од сообраќајот. Во тој момент, измамата била разоткриена.

Уапсени откако собрале 700.000 евра

Индиската полиција ги уапсила сопствениците на земјиштето и управителите на нелегалната наплатна станица, а сите биле обвинети дека организирале и воделе една од најголемите измами поврзани со сообраќајот во последните години.

Случајот се случил во 2023 година, но дури сега добил меѓународно внимание поради необичниот концепт и самата „претстава“, пишува „Marca“.

Повеќе од износот што бил собран, внимание привлекува сложеноста на измамата и леснотијата со која останала незабележана толку долго. Зашто, во текот на 18 месеци, буквално никој не посомневал...