Украина се соочува со критичен недостиг на противвоздушни ракети „Патриот“, а ситуацијата е многу лоша, изјави украинскиот претседател, Володимир Зеленски.
Во исто време, потпретседателот на САД, Џ.Д. Венс, го нарече прекинувањето на помошта за Киев едно од „најгордите“ достигнувања на администрацијата на Трамп, објави „Еуроњуз“.
За време на посетата на Германија, Зеленски вчера за националниот радиодифузер ЗДФ изјави дека ситуацијата со ракетите „Патриот“ е алармантна.
„Недостатокот е толку лош што не може да биде полош“, рече тој.
Зеленски, исто така, призна дека војната на Блискиот Исток влијае на Украина бидејќи ги намалува шансите на Киев да добие воена помош.
Ракетите „Патриот“, кои се произведуваат исклучиво во Соединетите Американски Држави, се клучни за Украина. Во оваа фаза од војната, тие претставуваат убедливо најдобрата одбрана што Украина ја има од руски балистички ракети.
Затоа, Киев се обидува да развие сопствена домашна антибалистичка воздушна одбрана. Украинскиот производител на оружје „Фајер Поинт“ неодамна објави дека работи на свој систем, со цел да го има готов до следната година. Компанијата бара соработка со европски партнери во областите на радарот, насочувањето и комуникациите.
Порано оваа недела, Зеленски рече дека домашниот антибалистички систем е врвен стратешки приоритет на земјата.
„Нашата безусловна задача е да создадеме сопствена воздушна одбрана што може да се справи со балистички ракети“, рече тој. Но, засега, Украина останува зависна од западните испораки и американските антибалистички ракети.
Европските партнери обезбедија огромно мнозинство од воената помош за Украина до 2025 година, што вклучува купување на клучни пресретнувачи „Патриот“ и друго американско оружје.
Зборувајќи вчера на настанот „Turning Point USA“ во Атина, Џорџија, американскиот потпретседател Џ.Д. Венс рече дека е горд што Вашингтон го прекинал финансирањето за Украина во услови на тотална руска војна.
„Очигледно, сè уште верувам во тоа и тоа е едно од нештата на кои сум најгорд во оваа администрација. Ѝ кажавме на Европа дека ако сака да купи оружје, може, но САД повеќе не купуваат оружје и не го испраќаат во Украина“, рече Венс.
Вториот човек во Белата куќа е меѓу најгласните критичари на помошта за Украина во рамките на администрацијата на Трамп.
