Ако барате освежување на фризурата оваа пролет, едно потстрижување веќе се издвои како омилено. Тоа е таканаречениот јапонски боб, стил кој комбинира софистицирана едноставност и малку скулптурален впечаток, со минимален, но ефикасен стајлинг.

Филозофијата на пристапот на „J-Beauty“ се базира на грижа и суптилен минимализам и токму овој пристап сега доминира во трендовите за коса. Во време кога сè повеќе се свртуваме кон едноставни, но внимателни решенија, не е изненадување што фокусот од негата на кожата и ноктите се префрли на фризурите. „Јапонскиот боб е одговорот на кул девојка на минимализмот“, го опишала познатата стилистка Саманта Кусик, нагласувајќи како успешно ги балансира практичноста и смелоста.

Што е јапонски боб?

„Јапонскиот боб е прецизно, скулптуриран рез кој се протега до брадата, дефиниран со чисти линии и суптилно виткање навнатре кои го врамуваат лицето“, објаснила стилистката Мелиса Тимперли.

Она што го прави уште поизразен е завршниот изглед – косата изгледа мазна и сјајна, речиси како ефект на „стаклена коса“. Резултатот е фризура која изгледа средено, но не премногу нападно.

Кому најмногу му прилега?

Овој боб функционира особено добро на права или малку брановидна коса, бидејќи текстурата ја нагласува нејзината прецизност. Тенката коса добива волумен благодарение на рамниот рез, додека густата коса може да се растовари одвнатре за да се одржи движењето.

Интересно е што може да функционира и на кадрава коса, но со одредено приспособување. „Кај кадриците, важно е да се земат предвид нивното собирање и структура. Потстрижувањето често се прави на суво за да се постигне природен резултат“, објаснила стилистката Лорејн Даблин. Во однос на обликот на лицето, јапонскиот боб е особено добар за овални, срцевидни и тркалезни лица бидејќи визуелно ги издолжува цртите на лицето. Сепак, клучот е персонализацијата. „Не станува збор за копирање, туку за приспособување на секое лице“, советува Кјузик.

Што треба да знаете пред да се потстрижете?

За разлика од пропуштените, разбушавени верзии на бобот, јапонскиот боб не е за оние кои сакаат незабележлив изглед. Неговите чисти линии ставаат акцент на лицето, особено на вилицата и вратот. Исто така, бара редовно одржување и стилизирање. „Тоа е фризура која изгледа најдобро кога е свежо потстрижена“, предупредила Кјузик.

Експертите советуваат да се избегнуваат тешки слоеви бидејќи тие ја нарушуваат нејзината препознатлива силуета, како и да се избере фризер кој има искуство со прецизно потстрижување.

Како да го стилизирате

Секојдневното стилизирање е клучно за постигнување на препознатлив изглед. Фенирањето со рамна четка помага да се создаде благо виткање навнатре, додека со пеглата за коса може дополнително да се нагласат краевите.

Производ за термичка заштита е исто така неопходен, а лесен серум или спреј ќе ѝ даде на косата сјај и мазност без да ја оптоварува. „Дури и мала количина на производ може да ги скроти непослушните влакна и да даде совршено мазен финиш“, истакнуваат експертите.