Републиканскиот сенатор Берни Морено изјави дека наскоро ќе претстави законски предлог за заострување на забраната на американската влада за влез на кинеските производители на автомобили на американскиот пазар.
Администрацијата на САД воведе сеопфатна регулатива која им забранува на сите кинески производители на автомобили продажба на патнички возила во Соединетите Американски Држави во јануари 2025 година, наведувајќи загриженост за националната безбедност поради способноста на возилата да собираат чувствителни податоци за американските сопственици.
Сенаторот Морено, говорејќи на Саемот за автомобили во Њујорк, рече дека неговиот предложен закон би отишол чекор понатаму од забраната за увоз и дека би ги затворил САД така што „никогаш нема да постои сценарио во кое кинески автомобил ќе влезе на нашиот пазар. Тоа е хардвер, тоа е софтвер, тоа се партнерства“, пренесува „Reuters“.
„Нема да има кинески автомобили овде и се надевам дека Јужна Америка, Мексико, Канада и Европа ќе ги усвојат истите стандарди. Ние не ѝ дозволуваме на компанијата „Huawei“ да влезе во нашата телекомуникациска инфраструктура, па нема ни кинеските производители на автомобили да влезат на овој пазар“, изјави Морено.
„Ќе спречиме канцер да влезе на нашиот пазар, а ќе биде потребно и другите земји да направат хемотерапија“, додаде Морено.
Кинеската амбасада во Вашингтон соопшти дека вратите на Кина се отворени за глобалните автомобилски компании, но дека „САД се ангажирани во трговски протекционизам и поставуваат бариери, вклучително и дискриминаторски политики за субвенции, за да го попречат пристапот на кинеските автомобили до американскиот пазар“.
Амбасадата додаде дека законот на Морено ги крши принципите на пазарната економија и фер конкуренцијата и претставува типичен пример на протекционизам и економска присила, на што Кина остро се спротивставува.
