Војводата од Сасекс, принцот Хари, тврдел дека со новинарката од „Mail on Sunday“, Шарлот Грифитс, не бил во особено близок однос. Но, пораките презентирани пред Врховниот суд оставаат впечаток дека биле поинтимни отколку што војводата опишал, пишува „The Telegraph“.

Хари ѝ испраќал низа приватни пораки на новинарката на Фејсбук, во кои, меѓу другото, се пошегувал на сметка на нивните „филмски галења“. Помеѓу декември 2011 и јануари 2012 година ѝ се обраќал со прекарот „шеќер“ и ги завршувал пораките со низа бакнежи.

Меѓутоа, Хари во јануари годинава на суд изјавил дека Грифитс ја сретнал само еднаш, на една забава, и дека веќе следниот ден „го прекинал контактот“ штом дознал дека е новинарка. Судењето, кое траело 11 недели, вчера било завршено со завршни излагања на адвокатите пред судијата Никлин, а неговата пресуда сè уште се очекува.

Запознавање на забава

Грифитс, која денес е главна уредничка, според пишувањето на „The Telegraph“, го запознала војводата на забава кај заеднички пријател, а пред Врховниот суд во март изјавила дека се движела во истите кругови како и помладите членови на кралското семејство.

Навела дека Хари во 2011 година ја додал на Фејсбук, потоа ѝ го испратил својот мобилен број, по што започнале со допишување. Додала и дека следниот јуни заедно поминале цела ноќ на една забава и продолжиле да разменуваат пораки и следното утро.

Кога војводата давал исказ, тврдел дека „нема поим“ дали таа се движи во неговите општествени кругови, инсистирал дека се сретнале само еднаш, на забава кај нивниот заеднички пријател Артур Ландон, и изјавил дека, откако дознал дека е новинарка, „поразговарал“ со пријателот и со тоа ја сметал работата за завршена.

Грифитс на суд изјавила дека во јуни 2012 година и таа и принцот Хари биле на куќна забава што ја организирал Артур Ландон, и дека ѝ останала во сеќавање затоа што им било „прилично смешно“ што војводата останал буден цела ноќ иако веќе следното утро требало да учествува на „Trooping the Colour“. Според наводите, листинзите од повици покажуваат еден телефонски разговор меѓу нив во 2:50 наутро и три СМС пораки разменети следното утро.

Да потсетиме, кралското семејство и другите тужители, меѓу кои е и Елтон Џон, го товарат „Associated Newspapers“ за низа наводно незаконски дејствија меѓу 1993 и 2011 година, но и по тој период, во еден од најгласните граѓански процеси во Обединетото Кралство во последните години. Судијата најави дека по Велигден ќе започне со работа на пресудата, но не прецизирал колку би можел да трае тој процес.