По повеќе од три децении соработка, партнерството меѓу фудбалската организација „FIFA“ и компанијата „EA Sports“ официјално заврши, оставајќи ги фановите во неизвесност околу иднината на најпознатиот фудбалски серијал. Сега конечно пристигна одговорот. Претставена е новата игра „FIFA Heroes“ и, иако не станува збор за традиционална симулација каква што многумина очекуваа, јасно е дека брендот тргнува во сосема поинаква, значително поаркадна насока.

Целосно нова насока за „FIFA“

„FIFA Heroes“, која ја развива студиото „Enver“, познато по VR наслови, се оддалечува од реализам и нуди хаотично фудбалско искуство пет на пет. Заборавете на бавни тактички акции и внимателно градење напади. Овде сè е подредено на брзина, атрактивни потези и кратки, експлозивни натпревари што траат едвај две минути. Целта очигледно не е директна конкуренција на „EA Sports FC“, туку создавање нова ниша насочена кон забава, достапност и чиста аркадна акција. Играта е дизајнирана за кратки сесии, идеални за мобилни уреди, но со доволна длабочина за да ги задржи играчите преку системи за сезонски напредок и онлајн натпревари.

Марадона додава до Тор, а Грилиш бега од Кралот Мајмун

Најнеобичниот и веројатно најзабавниот аспект на играта е списокот на ликови. „FIFA Heroes“ ги меша световите на начин што досега не е виден во спортски игри. На еден терен ќе се најдат фудбалски легенди како Диего Марадона, но и современи ѕвезди како Хари Кејн, Џек Грилиш, Едуардо Камавинга и Емилијано Мартинез. Но, тука приказната дури започнува. Ним ќе им се спротивстават, или дури ќе играат во ист тим, ликови од митологијата. Потврдено е дека играчите ќе можат да управуваат со Тор, нордискиот бог на громот, но и со Зевс, како и со Сун Вуконг, попознат како Кралот Мајмун од кинеската митологија.

Како тоа да не е доволно, во играта се вклучени и официјалните маскоти на претстојното Светско првенство 2026 година, па така ќе можете да водите тим составен од Марадона, Тор и, на пример, анимирано мече.

Огнени топки и метеорски удари

За дополнително да се нагласи аркадниот карактер, секој лик поседува уникатни супермоќи кои можат да го променат текот на натпреварот. Играчите нема само да дриблаат и шутираат, туку ќе користат специјални вештини како „магнетни лизгања“ што ја привлекуваат топката, удари кои ја претвораат топката во огнена кугла, па дури и телепортација низ теренот. Сето тоа, во комбинација со стилизирана, цртана графика, создава искуство што повеќе потсетува на „hero shooter“ игри отколку на класичен фудбал.

Кајл Џојс, директор на издавачката куќа „Solace“, ја објасни визијата зад проектот.

Последното нешто што сакавме да го создадеме беше уште една фудбалска симулација. Сакавме да внесеме брз „gameplay“ во „FIFA Heroes“ кој ќе ѝ се допадне на сосема нова генерација играчи.

Прво мобилни, па потоа конзоли

„FIFA Heroes“ ќе биде целосно бесплатна за играње („free-to-play“), а официјалното излегување е закажано за 28 април 2026 година. Играта најпрво ќе се појави на мобилни уреди (iOS и Android) и на PC. Верзии за конзоли, вклучително „PlayStation 5“, „Xbox“ и „Nintendo Switch“, се најавени за подоцнежен датум, веројатно во текот на летото истата година. Една од клучните карактеристики е целосна поддршка за „cross-progression“, што значи дека играчите ќе можат да го пренесуваат својот напредок меѓу сите платформи. Благодарение на партнерството со „Motorola“, играта ќе доаѓа и прединсталирана на одбрани нови уреди на компанијата, како моделот „Razr“.