Отпадот од туризмот го загадува морето

Истражувањето, кое го спроведе Федералниот универзитет Парана, а чии наоди беа објавени минатиот месец во списанието „Environmental Pollution“, го анализираше морскиот живот во регионот. Научниците откриле дека отпадот создаден поради туризмот и нуркањето доведува до тоа ајкулите да внесуваат супстанции фрлени во океанот. Во тој контекст, лековите и другите фармацевтски производи се вброени во категоријата на таканаречени загадувачи што предизвикуваат сè поголема загриженост поради нивното потенцијално влијание врз дивите животни.

Раководителката на проектот, истражувачката Наташа Восник, изјави дека наодите се добиени со анализа на примероци од крв од 85 ајкули од подрачјето околу островот Елеутера. Кај една третина од нив биле пронајдени траги од фармацевтски производи. Во студијата, за која се тврди дека е прва од ваков вид, се предупредува дека е клучно да се разбере влијанието на овие хемикалии врз ајкулите од економски и биолошки причини.

Авторите навеле: „Затоа разбирањето на влијанието на овие загадувачи врз физиологијата на ајкулите и долгорочното здравје на популацијата станува од пресудна важност, не само заради заштита на клучната еколошка компонента на крајбрежните екосистеми, туку и заради зачувување на општествените и економските придобивки што тие ги носат“. Како можен извор на загадување, покрај дејствувањето на поединци, авторите ги навеле и изгубените или отфрлените пратки со дрога.

Слични откритија и во Бразил

Ова не е првпат кокаин да биде пронајден кај ајкули. Една претходна студија во Бразил исто така откри присуство на оваа дрога и ги поттикна научниците да предупредат дека тоа би можело да го менува нивното однесување. Како и во студијата на Бахамите, истражувачите сугерираа дека може да постојат повеќе причини зошто ајкулите ги внесуваат овие супстанции во организмот.

Научниците, кои својата студија ја објавија во списанието „Science of the Total Environment“, тестирале 13 примероци од бразилскиот вид ајкула остроноска кои биле уловени од рибари. Кај повеќето биле пронајдени високи нивоа на илегалната дрога. Британската научничка и членка на тимот од Фондацијата Освалдо Круз, Рејчел Ен Хаузер-Дејвис, изјави во 2024 година дека резултатите од нивната студија покажале „хронична изложеност поради консумација на кокаин во Рио де Жанеиро и испуштање на човечка урина и фекалии преку канализациските одводи, како и од илегални лаборатории“.

Истражувачите предупредија дека внесувањето дрога би можело да го промени однесувањето на ајкулите, но истакнаа дека се потребни понатамошни истражувања.