32-годишникот е голманот со најмногу настапи во историјата на „Рисовите“ со 86 настапи и е еден од најискусните играчи во репрезентацијата.

Роден во Куманово, Димитриевски остава впечаток на смирена, самоуверена, скромна и понекогаш духовита личност, како што открива во ексклузивно интервју за „Flashscore“, во кое зборува за детските спомени од Светските првенства, го најавува натпреварот против Данска и открива кој соиграч од Валенсија го оставил без зборови.

„Се сеќавам како го гледав Светското првенство во 2002 година на телевизија, со Роналдо Назарио кој играше за Бразил и Дејвид Бекам за Англија. Татко ми мѝ купи албум со сликички, кој, интересно, успеав некако да го испуштам во Вардар кога бевме во Скопје.

Години подоцна, пред „Euro 2020“, татко ми се сети на таа приказна и почна да собира албум од изданието за 2020 година затоа што јас бев вклучен во него. Никогаш не помислил дека еден ден ќе собира албум во кој ќе има и сликичка од мене“, се присетува Димитриевски.

66-тата репрезентација на ранг-листата се пласираше во баражот за Светското првенство вторпат по ред, откако заврши на првото место во Групата 4 од „Nations League C“.

Во 2022 година нашите фудбалери ја шокираа Италија во полуфиналето, но загубија од Португалија во финалето. Тој пораз од Порто и денес го прогонува и мотивира Димитриевски:

„Натпреварот против Португалија беше еден од најважните во историјата на репрезентацијата, затоа што победникот одеше на Светското првенство 2022. Сега имаме нова шанса да испишеме историја и мора да ја искористиме со двете раце и конечно да го оставиме тој пораз зад нас.“

Овојпат Данска стои на патот на Македонија во полуфиналето од баражот, а стадионот „Parken“ е распродаден. Сепак, голманот верува во тимот и смета дека не би било фер победата да се нарече „изненадување“.

„Ова е веројатно еден од најважните натпревари во нашите кариери и мора да излеземе како вистински мажи, да го одиграме најдоброто, да го спроведеме тактичкиот план и да победиме“, анализира Димитриевски.

„Имаме квалитет, имаме план и ќе дадеме сè од себе да одиграме подобар фудбал од нив и да победиме. Не мислам дека е фер да се зборува за ’изненадување‘, затоа што сме многу добар тим кој може да победи.“

Нема меден месец засега

Напаѓачот на Наполи и Данска, Расмус Хојлунд, изјави за данските медиуми дека „сè уште нема резервирано летен одмор и дека Македонија не е Германија или Франција“. На прашањето дали тоа е провокација, Димитриевски со насмевка одговори:

„Ни јас немам резервирано меден месец, така што оди во двете насоки.“

Сепак, формата на голманот може да биде клучна во дуелот, особено што неговиот соиграч Елиф Елмас игра со Хојлунд во Неапол.

„Ќе се подготвиме најдобро што можеме како тим, а потоа ќе разговараме за некои детали што можат да ми помогнат мене и на одбраната. Како голман, морам да дадам стабилност, а кога тоа ќе го направам, тимот е многу посигурен и поорганизиран“, објаснува Димитриевски.

Неговото семејство и пријатели ќе бидат на трибините во Копенхаген, а тој е решен да го оствари сонот и да ја одведе Македонија на првото Светско првенство, инспириран од својот соиграч од Валенсија.

„Пласманот на Светското првенство 2026 би бил врвот на мојата кариера. Имам пример во Гвидо Родригез од Валенсија, кој го освои Светското првенство 2022 со Аргентина и ми покажува колку е тоа големо достигнување.

Голема чест е да се игра за Македонија. Јас сум натпреварувач по природа и сакам да играм, а тоа што сум настапил повеќе од 80 пати е огромна гордост“, додава Димитриевски.

Главен човек во Валенсија

Димитриевски се наметна како еден од најконстантните голмани во Рајо Ваљекано пред да премине во Валенсија во летото 2024 година. Минатата сезона беше резерва на Џорџи Мамардашвили, а оваа на Хулен Агирезабала, пишува "Flashscore".

Сепак, по повредата на Агирезабала на почетокот на годината, Димитриевски ја искористи шансата на „Местаља“ и запиша пет натпревари без примен гол во 13 настапи.

„Минатото е зад мене, сега сум фокусиран на натпреварите што следуваат и сакам да ја завршам сезоната на најдобар можен начин“, вели Димитриевски.

Неговиот договор истекува на крајот на сезоната, со опција за продолжување.

„И јас и клубот сме фокусирани на резултатите, но наскоро ќе има разговори и се надевам дека ќе најдеме решение што ќе одговара на двете страни.“

Со подобрените резултати, „Валенсија“ се искачи на 12-то место. Клучна улога има Гвидо Родригез.

„Гвидо Родригез е светска класа. Игравме често еден против друг кога беше во ’Бетис, но кога го гледате одблизу, навистина ја сфаќате неговата вредност.“

Клубот наскоро ќе се пресели на нов стадион „Ноу Местаља“.

„Секогаш поминуваме покрај новиот стадион. Тој е многу важен за иднината на клубот и навивачите и ќе овозможи уште поголеми успеси“, додава Димитриевски.

На крајот, тој открива кој му е идол и кој е најдобар голман денес.

„Мој идол е Џанлуиџи Буфон, но во последните десет години мислам дека Тибо Куртоа е еден од најдобрите и најдоминантните на својата позиција, иако Марк-Андре тер Штеген и Јан Облак се исто така фантастични“, заклучува Димитриевски.