Дваесет камили биле дисквалификувани од натпревар за убавина во Оман, откако ветеринарните прегледи откриле дека животните биле подложени на козметички зафати, вклучувајќи ботокс и филери.
Скандалот се случил на Фестивалот за убавина на камили 2026 во Ал Мусана, еден од најпрестижните регионални настани за одгледување и изложување камили, пишува „Dexerto“.
Организаторите потврдиле дека камилите биле исфрлени од натпреварот откако инспекторите пронашле докази за вбризгување ботокс, дермални филери, силикон и користење хормонски третмани. Во соопштението порачаа дека се посветени на борба против „сите облици на мамење и разубавување на камили со недозволени средства“ и најавија строги казни за оние што ги прекршуваат правилата.
На натпреварите за убавина на камили, судиите оценуваат четири главни категории: влакно, врат, глава и грпка. Се бара сјајно и добро дефинирано влакно, долги и широки вратови, големи глави со опуштени усни и темни трепки, како и правилно обликувана грпка со цврст став.
Ветеринарните инспектори утврдиле дека дисквалификуваните камили биле подложени на зафати токму за да се подобрат овие карактеристики. Меѓу откриените методи се инјекции со хијалуронска киселина за зголемување на усните, филери и силикон за преобликување на носот, ботокс за опуштање на мускулите на лицето, силиконски восок за промена на изгледот на грпката и хормони за поттикнување на мускулната дефиниција.
Влоговите на ваквите натпреварувања се многу високи низ целиот Заливски регион. Победничките камили на своите сопственици им носат престиж, значајна вредност во одгледувањето и големи парични награди. Наградните фондови на најголемите фестивали можат да достигнат десетици милиони долари, што создава огромен притисок врз одгледувачите нивните животни да изгледаат совршено.
Дисквалификациите во Оман не се прв ваков случај. На Фестивалот на камили „Крал Абдулазиз“ во Саудиска Арабија во 2018 година, неколку камили биле исфрлени поради користење филери и ботокс. Три години подоцна, во 2021 година, од истиот фестивал биле отстранети повеќе од 40 камили откако официјалните лица откриле уште поширок спектар недозволени методи, вклучувајќи хормонски третмани и техники на вештачко надувување на ткивото.
Ветеринарните експерти предупредуваат дека козметичките зафати можат да предизвикаат сериозни здравствени проблеми. Пријавените компликации вклучуваат инфекции, отоци, оштетување на ткивото и хронични воспаленија, особено кога зафатите се изведуваат без стручен медицински надзор.
Употребата на ботокс може да ги наруши мускулите на лицето кои се клучни за хранење и пиење, додека филерите и силиконот можат да мигрираат и да предизвикаат долготрајни воспалителни процеси. Хормонските третмани ја нарушуваат природната физиологија на животното и можат да доведат до неплодност, промени во однесувањето и ендокрини нарушувања.
Дисквалификуваните камили им се вратени на сопствениците, а организаторите повториле дека на идните натпревари ќе се оценува исклучиво природниот изглед на животните.
