За овој јапонски производител слушаме уште од моделот „Orochi“, кој се произведуваше од 2006 до 2014 година. Во меѓувреме бевме сведоци на бројни екстремни преработки кај кои речиси е невозможно да се препознае изворниот модел.

Таков е и „Ryugi“, ретро лимузина базирана на „Toyota Corolla Axio“, која се збогува со пазарот со специјалното издание „Final Edition“, ограничено на само 20 примероци. Цената е, очекувано, значително повисока од онаа на основниот автомобил врз кој се темели.

„Final Edition“ во голема мера ја следи оригиналната идеја за ретро-дизајн инспириран од луксузните британски лимузини од доцните 1950-ти години. Како посебен детаљ на прошталната серија е додаден уникатен амблем на капакот на багажникот со мотив на часовник – симбол на крајот на производството.

На купувачите им е понудена само една боја на каросеријата – „Black Mica“. Во зависност од нивото на носталгија, автомобилот може да биде опремен со класични челични тркала со капачиња или алуминиумски фелни во „BBS“ стил.

Рачно изработените предни и задни делови на каросеријата ги продолжуваат превисите и носат кружни предни светла, овални задни светла, хромирани браници и исправена предна маска.

Од ветробранското стакло наназад, автомобилот останува препознатлив како „Corolla Axio“. Покривот, вратите, стаклените површини и голем дел од ентериерот се преземени од донор-моделот, но „Mitsuoka“ ја обложи кабината со кожа за да се оддалечи од впечатокот на класична компактна лимузина.

Механиката останува на „Toyota“

Технички, „Ryugi“ целосно ја следи „Corolla Axio“. Атмосферскиот 1.5-литарски бензински мотор развива 102 коњски сили и силата ја пренесува на предните или на сите четири тркала преку „CVT“ менувач. Достапна е и хибридна верзија, која комбинира 1.5-литарски бензински мотор и еден електромотор.

Ограничена понуда

Цените во Јапонија започнуваат од 3.305.500 јени, односно околу 18.200 евра за бензинската верзија. Хибридниот модел чини приближно 21.200 евра.

За споредба, основната „Toyota“ „Corolla Axio“ во Јапонија почнува од околу 9.000 евра.

Постои и караванска верзија

Иако лимузината се повлекува, „Mitsuoka“ не се откажува целосно од оваа формула. Во понудата останува „Ryugi Wagon Adventure“, базиран на „Toyota“ „Corolla Fielder“, караван со бензински мотор.

Оваа верзија додава елементи во кросовер-стил, како кровни носачи, мат-црни столбови, специфични фелни, поиздржливи гуми, посебни бои и поотпорни навлаки за седиштата. Цената изнесува околу 24.100 евра.