Во едно мало село на истокот на Франција неодамна беше отворена гаража која криела тајна речиси половина век. Пронајден е „Renault 5“ од 1982 година, во состојба како штотуку да излегол од салон, со неверојатни 12 километри на бројачот.
Стравот посилен од желбата за возење
Сопственичката на автомобилот, позната само како госпоѓа М, со години штедела 40.000 франци за да си го дозволи овој металик син модел. Но, судбината имала поинаков план. Откако паднала на возачкиот испит во есента 1982 година, кај неа се појавил необјаснив страв.
Дури и кога подоцна го положила испитот, стравот од улицата бил посилен. Нејзиниот нов „Renault“ останал паркиран во гаража, покриен со прашина, цели 43 години.
Автомобил со мирис на фабрика
Кога ентузијастите од групата „Phares Jaunes“ ја отвориле гаражата, затекнале фасцинантна глетка. На бројачот стоеле само 12 километри — дистанца што ја поминал работник од салонот при испораката на автомобилот. На возилото сè уште имало пробни таблички, додека новите стоеле нераспакувани во багажникот. Внатрешноста и моторот се во совршена состојба, без ниту една трага од користење.
Оди на аукција за неверојатна сума
Овој спектакуларен „пронајдок од гаража“ („barn find“) ќе биде продаден на аукција во Париз на 15 март. Иако госпоѓа М во тоа време платила вистинско богатство, се проценува дека овој колекционерски примерок ќе достигне цена меѓу 5.000 и 10.000 евра.
За љубителите на олдтајмери, ова е можност што се појавува еднаш во животот — да поседуваат легендарен „Renault 5“ кој практично никогаш не видел пат.
