Нова фотографија која се појави на социјалните мрежи покажува дека Кина не престанува да ги проширува своите ударни способности.
Кина, како што изгледа, добила нови напредни способности за противбродски удари од носачи на авиони, со надзвучната противбродска ракета YJ-15, која за првпат може да се види на подкрилните носачи на кинескиот борбен авион J-15 T.
Фотографијата што неодамна се појави на социјалните мрежи прикажува две вакви ракети под крилјата на повеќенаменски борбен авион на кинеската воена морнарица, што укажува и на можен оперативен дебит на овој проектил во службата на кинеската воена морнарица, пренесува порталот „The Aviationist“.
YJ-15 изненадувачки потсетува на руската ракета Kh-31 и се чини како напредок во однос на претходната надзвучна ракета YJ-12. Четирите асиметрични влезови за воздух укажуваат на присуство на "ramjet" или "scramjet" погон за постигнување високи надзвучни брзини, додека четири долги аеродинамични стабилизатори и мали стабилизирачки крилца овозможуваат корекции во средната фаза на летот. Потисниот дел додава свои четири крилца.
Според информациите на списанието „Janes“, оваа ракета наводно има дострел до 1.800 километри.
Претходни набљудувања укажуваат на заедничка логистика меѓу кинеската воена морнарица и кинеското воено воздухопловство. Фотографија уште од 2022 година прикажуваше борбен авион J-16 на кинеското воено воздухопловство со ракета YJ-15, што укажува на можна заедничка употреба и рационализација на трошоците.
Кинеските бомбардери H-6K исто така носат YJ-15 заедно со други проектили, како YJ-21/KD-21.
Самиот борбен авион J-15 T ја задржува улогата на водечки борбен авион на кинеската воена морнарица, способен за воздушни борби и удари врз површински цели, слично на американскиот F/A-18E/F Super Hornet.
Кинескиот носач на авиони Фуџијан располага со авиони J-15 T, J-15DT, J-35, KJ-600 AWACS и сега потенцијално противбродската ракета YJ-15, со што кинеската воена морнарица добива нова способност за противбродски удари.
Ракетата YJ-15 ги надополнува проектилите YJ-18 ASCM и хиперсоничната YJ-20 ASBM, лансирани од палуба, со што се заокружува двојната ударна способност на носачот и се зајакнуваат слоевитите способности на Кина за противбродски удари на големи растојанија. Со други зборови, Американците добија уште една причина внимателно да ги преиспитаат своите потези кога станува збор за евентуална конфронтација со Кина.
