Руското Министерство за надворешни работи, заедно со своите сојузници и партнери, го разгледува предлогот на американскиот претседател Доналд Трамп за приклучување кон Комитетот за мир, изјави денес портпаролот на Кремљ, Дмитриј Песков.
Тој рече дека прашањето го разгледува руското Министерство за надворешни работи во согласност со упатствата на претседателот на Русија, Владимир Путин, објави РИА Новости.
Песков, одговарајќи на новинарско прашање дали е разјаснето што ќе се случи со замрзнатите руски средства што Москва предложи да ги испрати до Комитетот за мир за реконструкција на Појасот Газа, рече дека Русија сè уште не добила одговор на својата иницијатива.
„Таков предлог даде рускиот претседател. Сè уште не сме добиле одговор“, рече Песков, пренесува Танјуг.
Путин во јануари изјави дека околу 1 милијарда долари замрзнати руски средства би можеле да бидат насочени кон Комитетот за мир за реконструкција на Појасот Газа.
„Преостанатите средства од нашите замрзнати средства во САД би можеле да се искористат за обнова на териториите оштетени за време на борбите, по склучувањето на мировниот договор меѓу Русија и Украина“, рече Путин.
Портпаролот на Кремљ, Дмитриј Песков, денес изјави дека збирот на меѓусебни договори меѓу Русија и Соединетите Американски Држави, постигнати во Алјаска минатата година, го претставува „духот на Анкориџ“ и дека овие договори можат да доведат и до пробив во прашањата за решавање на украинскиот конфликт.
„Постои цела низа договори што беа постигнати во Анкориџ, кои веќе беа објавени уште пред самиот состанок, за време на пристигнувањето на специјалниот претставник на американскиот претседател Стивен Виткоф. Токму овој збир на договори што беа постигнати го претставува „духот на Анкориџ“, прецизираше Песков на прес-конференцијата, објави Спутник.
Според портпаролот на Кремљ, токму по тоа се појави потребата да се одржи состанок на највисоко ниво.
Песков додаде дека Русија и САД работат на спроведување на договорот што претседателите на двете земји, Владимир Путин и Доналд Трамп, го постигнаа во Алјаска и рече дека работата за решавање на украинското прашање продолжува. Како што изјави портпаролот за печат на рускиот претседател, договорите постигнати на самитот во Анкориџ се фундаментални и имаат потенцијал да го подобрат процесот на решавање на украинскиот конфликт, пренесува Танјуг.
Песков заклучи дека Кремљ не сака јавно да навлегува во деталите за договорите постигнати во Анкориџ и дека дискусиите треба да се водат зад затворени врати. Преговорите меѓу претседателите на Русија и САД во Алјаска се одржаа на 15 август во воената база Елмендорф-Ричардсон во близина на Анкориџ.
Претходно, претседателот Путин рече дека Москва се залага исклучиво за долгорочно решение на украинскиот конфликт, но дека тоа може да се постигне само откако ќе се отстранат првичните причини за конфликтот, имено заканите за националната безбедност што произлегуваат од проширувањето на НАТО, како и угнетувањето на рускојазичното население во Украина, потсети Спутник.
