На официјалните профили на Белата куќа денес беше објавена AI-генерирана фотографија на американскиот претседател Доналд Трамп како води пингвин со американско знаме, со опис „Прегрни го пингвинот“, додека во далечината се гледа знамето на Гренланд.
Од Вашингтон продолжуваат со провокативни содржини упатени кон Гренланд и Гренланѓаните, при што последната објава на Белата куќа изостави еден битен детал.
На фотографијата генерирана со вештачка интелигенција, Трамп води пингвин кој носи американско знаме на терен што би требало да го претставува Гренланд, со опис „Прегрни го пингвинот“.
Embrace the penguin. pic.twitter.com/kKlzwd3Rx7
— The White House (@WhiteHouse) January 23, 2026
Меѓутоа, иако островот е окован со мраз, на Гренланд сепак не живеат пингвини. Напротив, најсеверната точка на која живеат пингвини се Галапагоските Острови.
Она што е особено интересно е дека со верификација на веродостојноста, „X“ под објавата на Белата куќа додаде дека „пингвините не го населуваат Гренланд“.
Од друга страна, на „X“ профилот на Министерството за внатрешна безбедност на САД беше објавено видео на кое осамен пингвин од популарното меме повикува на приклучување кон САД, со демонстрација на американската воена моќ.
