Додека патувањата некогаш беа можност за опуштање далеку од притисоците на модерниот живот, денес „WiFi-то“ е практично насекаде, пишува „Daily Mail“.

Во последните неколку години се појави нова категорија травел инфлуенсери, кои соработуваат со туристички организации и брендови за да промовираат дестинации во замена за пари. На Инстаграм, хаштагот #travelingram има повеќе од 31,2 милиони објави.

Но, оваа нова ера на патувачки трендови им нанесува штета на локалните жители кои живеат во областите што ги посетуваат туристите.

Халштат особено „страда“

Еден од најпознатите примери е малото австриско гратче покрај истоименото езеро – Халштат, кое се соочува со сериозен проблем на прекумерен туризам.

Халштат, кој е под заштита на УНЕСКО, има нешто повеќе од 700 жители, но во сезона прима и до 10.000 посетители дневно. Постојат дури и специјални места за фотографирање означени на „Google Maps“, кои често се исклучително преполни.

Во 2023 година, жителите привремено поставија дрвен ѕид на најпопуларното место за селфи-фотографии, со што го блокираа погледот кон Алпите, како знак на протест поради бучавата и сообраќајот. По реакциите на социјалните мрежи, ѕидот беше отстранет.

Остров во Франција на границата на издржливост

Уште едно место што доживеа силен притисок од прекумерен туризам е Мон Сен Мишел, плимниот остров во Нормандија, Франција.

Познат по својата драматична готска опатија на карпа, овој локалитет под заштита на УНЕСКО секоја година привлекува околу 3 милиони посетители во тесните улички. Тоа доведува до долги редици и оштетувања, па надлежните размислуваат за мерки како систем на резервации, ограничување на бројот на посетители и промовирање посети вон сезона, со цел подобро управување со гужвите и зачувување на локалитетот.

Велика Британија исто така на удар на туристи

Поблиску до дома, железничката станица „Goathland Station“ во Северен Јоркшир, која се појави во првиот филм за Хари Потер, во последните две децении доживеа голем прилив на посетители, што предизвика гужви на улиците и долги редици за фотографирање на клучните места.

Исто така во Велика Британија, селото Бибури во Глочестершир во септември беше прогласено за најубаво село во светот од магазинот „Forbes“.

Познато по терасата од 17 век, која се појавува во филмови како „Stardust“ и „Bridget Jones’s Diary“, селото може да привлече и до 20.000 посетители за време на викендите – повеќе од 30 пати повеќе од неговата вообичаена популација.

Но, со автобуси полни со еднодневни туристи кои минуваат низ тесните улички, зголемениот број посетители доведе до сообраќајни метежи, проблеми со паркирањето и застои.

Во поголемиот дел од годината, локалците велат дека селото станува како Див Запад, со автомобили и автобуси кои доведуваат илјадници луѓе во малата заедница.

Порастот на посетителите делумно е поттикнат од таканаречените инфлуенсери, кои на социјалните мрежи промовираат села со околу 600 жители како совршени дестинации за еднодневни излети од големи градови, како Лондон.

Сега, откако жителите на Бибури побараа конкретни мерки и формираа работна група во која беа вклучени советници и полицијата, округот Глочестершир најави планови за решавање на проблемот.

По пробната програма во мај, со која привремено беа затворени постојните автобуските постојки и беа создадени побезбедни места за пристигнување и заминување на автобусите, се планира овие промени да станат трајни.