Празничниот период е пред нас, а тоа значи само едно – телевизиските програми се полни со божиќни класики. Иако изборот е голем, од филмови како што се „Love Actually“ до „Elf“, еден наслов се истакнува како неизоставен: „Home Alone“.
Овој култен филм од 1990 година ја лансираше кариерата на Меколи Калкин, кој ја игра улогата на осумгодишниот Кевин Мекалистер. Како што сите знаеме, неговото огромно семејство, во брзање за божиќниот одмор во Париз, случајно го остава сам дома, каде што тој мора да се брани од пар несмасни провалници.
Иако филмот е семеен класик, многумина гледачи со години се прашувале како семејството Мекалистер можело да направи таков голем пропуст. Знаеме дека доцнеа поради прекин на струјата и погрешно ги преброија децата, но едно прашање останува: како никој на аеродромот не забележа дека недостасува еден авионски билет?
Клучниот детаљ што повеќето го пропуштиле
Одговорот се крие во детаљ во една кратка сцена што многумина не ја забележале. Имено, вечерта пред патувањето, за време на караницата меѓу Кевин и неговиот постар брат Баз, се пролева млеко по пасошите и авионските билети. Во создадената гужва и чистење, таткото на Кевин, Питер, случајно го зема билетот на Кевин заедно со мокрите салфети и ги фрла во канта.
Иако сè се случува во неколку секунди, камерата кратко ја прикажува кантата за отпадоци во која, меѓу фрлените салфети, јасно се гледа и авионскиот билет со името на Кевин. Токму овој детаљ објаснува зошто никој на аеродромот не сфатил дека им недостасува едно дете – едноставно немале вишок билет.
Фановите во неверување
Ова откритие неодамна стана вирално на социјалните мрежи, а многу долгогодишни фанови на филмот останаа изненадени што никогаш претходно не го забележале овој клучен момент.
„Океј, ова е лудо и сигурен сум дека луѓето многупати го забележале овој скриен детаљ, но јас само што сфатив дека таткото на Кевин случајно го фрла неговиот авионски билет во канта. Тоа објаснува како не сфаќаат дека некој им недостасува во текот на делењето на билети на излезот“, вели еден корисник на социјалните мрежи.
Друг напишал: „30+ години подоцна сфаќам дека таткото во „Home Alone“ го фрла билетот на Кевин во канта?“.
Еден обожавател истакнува дека ова откритие „додава контекст“ на реченицата на Кевин во продолжението на филмот кога вели: „Добро е што имам сопствен билет, во случај да се обидете да ме оставите“.
