Замислете го следново сценарио: пристигнал Божиќ, а откако на подарок добиете сосема нова книга од своето семејство, едвај чекате удобно да се сместите во вашиот омилен агол за читање со шолја омилен топол напиток.
Остатокот од вечерта го поминувате нурнати во фасцинантниот свет на книжевноста.
Токму така Исланѓаните секоја година го дочекуваат еден од најважните христијански празници. Оваа единствена традиција, позната како „Jólabókaflóð“, што во превод приближно значи „поплава од божиќни книги“, ги поттикнува луѓето да ја споделуваат радоста од читањето и да разменуваат приказни, а самиот обичај со генерации создава топла атмосфера и незаборавни моменти во многу домови за време на празниците, пишува „putnikofer.hr“.
Божиќниот дух на Исланд: „Jólabókaflóð“ и радоста на читањето
„Jólabókaflóð“ настанал за време на Втората светска војна, кога хартијата била еден од ретките ресурси што не недостасувал на Исланд. Поради тоа, Исланѓаните почнале да подаруваат книги, бидејќи биле лесно достапни, додека другите производи биле реткост.
Овој посебен контекст за време на војната оставил неизбришлива трага врз исландската култура, претворајќи ги во народ што ги цени книгите повеќе од кога било претходно во својата историја. Според резултатите од истражување спроведено на Универзитетот „Bifröst“, дури 50 отсто од Исланѓаните годишно читаат повеќе од осум книги, додека неверојатни 93 отсто од Исланѓаните барем еднаш годишно одвојуваат време за читање.
Оваа страст кон книгите не е само одговор на воените околности, туку е длабоко вкоренета во исландското секојдневие, правејќи ги народ на вистински љубители на книжевноста.
Топло чоколадо, добра книга и заедништво
Уште од 1944 година, исландските книжарници традиционално испраќаат каталог со книги до секое домаќинство во средина на ноември, во периодот кога се одржува Саемот на книги во Рејкјавик. Луѓето со радост го користат овој каталог за да нарачаат книги што ќе им ги подарат на своите пријатели и семејството на Бадник, кој е централниот ден за подарување на Исланд.
Кога ќе се отворат сите подароци, обичај е сите да се опуштат со шолја топло чоколадо и удобно да се сместат за да го поминат остатокот од вечерта уживајќи во читањето на своите нови книги.
„Jólabókaflóð“ со текот на времето станал симбол на исландскиот пристап кон празниците, каде што фокусот се става на заедништвото, споделувањето приказни и уживањето во убавината на пишаниот збор. Оваа практика го поттикнува читањето и ги промовира семејните врски и размената на културни добра меѓу луѓето.
