Шокантните извештаи што деновиве пристигнуваат од Соединетите Американски Држави ги откриваат размерите на досега невиден план за масовни депортации, кој, според предупредувањата на организациите за човекови права, се заканува да ја претвори миграциската политика во студен, индустриски процес лишен од основно човечко достоинство.
Документите до кои дошле американските медиуми отвораат прашања за границите на државната моќ, комерцијализацијата на притворот и споредувањето на човечките судбини со логистичките ланци на глобалните корпорации.
Нацрт-документ на функционери на американската Служба за имиграција и царина (ICE), за кој извести „The Washington Post“, открива досега невидени детали од планот на агенцијата за спроведување масовни депортации со користење огромни индустриски магацини, пренаменети за притвор на десетици илјади луѓе. Документот доаѓа осум месеци откако вршителот на должноста директор на „ICE“, на конференција за безбедност на границите, изјавил дека администрацијата на Доналд Трамп сака да спроведува депортации исто толку ефикасно колку што Амазон ги испорачува своите пратки. Според извештајот, „ICE“ оваа недела планира да им испрати барање за доставување предлози на приватни компании што управуваат со притворски капацитети.
Предлогот ги повикува изведувачите да учествуваат во обновата на индустриски магацини низ целата земја, од кои секој би можел истовремено да прими до 10.000 притвореници. Станува збор за објекти кои веројатно ќе се соочуваат со лоша вентилација, проблеми со контролата на климата, како и со недоволна водоводна и одводна инфраструктура. Во документот се наведува дека „ICE“ планира да ги преуреди магацините во одделни станбени единици со бањи и тоалети, трпезарии, медицински единици, рекреативни простори и правни библиотеки.
Иако агенцијата тврди дека новите објекти ќе „ја максимизираат ефикасноста, ќе ги намалат трошоците, ќе го скратат времето на обработка, ќе ги забрзаат преместувањата и ќе ја подобрат безбедноста, достоинството и почитта кон сите лица во притвор на ICE“, организациите за човекови права планот го оценуваат како длабоко дехуманизирачки.
Особено предупредуваат на изјавата на вршителот на должноста директор од април, според која депортациите треба да се третираат „како работа, како Amazon Prime, но со човечки суштества“. Според планот, седум големи магацини во Луизијана, Вирџинија, Тексас, Аризона, Џорџија и Мисури би служеле како т.н. подготвителни центри за депортација, со капацитет од 5.000 до 10.000 лица по објект. Покрај тоа, би биле воспоставени уште шеснаесет помали центри, секој со капацитет до 1.500 притвореници, со што вкупниот број лица во притвор во еден момент би можел да достигне 80.000, во споредба со околу 68.000 колку што ги имало на почетокот на декември.
