Деловниот партнер на Џејк Пол и коосновач на „Most Valuable Promotions“ (MVP), Накиса Бидаријан, соопшти дека се ангажирани правни тимови со цел да се санкционираат тврдењата дека мечот со Ентони Џошуа бил наместен.
Нокаутот што Ентони Џошуа му го приреди на Џејк Пол во Мајами и понатаму е главна тема во светот на боксот, но фокусот од рингот сè повеќе се префрла во судницата. Промоторската куќа „Most Valuable Promotions“ одлучи да стави крај на шпекулациите за регуларноста на мечот и да поднесе тужби против сите што јавно тврдат дека борбата била режирана.
Иако обвинувањата за местење ја следеа речиси секоја борба на јутјуберот кој стана боксер, бруталниот пораз од поранешниот шампион во тешка категорија очигледно беше точката на пресврт за неговиот тим.
Деловниот партнер на Џејк Пол и коосновач на MVP, Накиса Бидаријан, потврди во емисијата „The Ariel Helwani Show“ дека се ангажирани правни тимови за да се санкционираат неоснованите тврдења што го преплавија интернетот. На директното прашање на водителот дали настапот на Пол, и покрај тешкиот нокаут, ги замолчил теоретичарите на заговор, Бидаријан имаше подготвен одговор.
„Не, всушност не. Нашите адвокати активно гонат бројни луѓе.“
Ова е првпат тимот на Пол да преземе конкретни правни чекори, иако слични наративи постоеле и претходно. Самиот Џејк Пол во повеќе наврати нагласуваше дека обвинувањата за местење се апсурдни, потсетувајќи ја јавноста дека манипулацијата со професионални спортски настани во САД претставува федерално кривично дело.
Денес
