Само пет дена по операцијата, бил способен да управува со инвалидската количка, да пребарува на интернет, да игра видеоигри и да ги контролира паметните апарати за домаќинство.
Дваесет и осумгодишниот маж, парализиран поради тешка повреда на ’рбетниот мозок пред осум години, успешно контролирал уреди користејќи го само својот ум и тоа пет дена по операцијата на вградување мозочен имплант во Кина.
Овој пробив е дел од првото клиничко испитување во земјата на целосно имплантиран, целосно безжичен, целосно функционален интерфејс мозок-компјутер (BCI), пишува „Euronews Next“.
„BCI“ го поврзуваат нервниот систем на една личност со уреди способни да ја толкуваат нивната мозочна активност, дозволувајќи им да дејствуваат – како што е користење компјутер или движење на протетичка рака – само со моќта на своите мисли.
„Тој може да контролира апарати за домаќинство, па дури и да управува со својата инвалидска количка – сето ова може да се постигне“, рекол професорот Мао Јинг, претседател на болницата Хуашан на Универзитетот Фудан.
Уредот, што го развила компанијата „Shanghai NeuroXess“, користи 64 електроди – секоја со ширина од само 1% од ширината на човечкото влакно – што го прави еден од најмалите и најмалку инвазивни вградливи „BCI“ во светот.
Електродите се вградуваат во мозокот, додека контролорот, батеријата, антената и процесорот се наоѓаат под кожата на градниот кош.
Надворешниот безжичен полнач, сличен на полначите за телефони, овозможува самостојно полнење и користење на уредите.
„Вградената батерија е многу важен чекор. Постигнувањето одржливо снабдување со енергија и долгорочна употребливост се клучен фактор за примена на оваа технологија во човечкото тело“, изјавил Жанг Ху, невронаучник и академик на Кинеската академија на науки.
Еден месец и пол по операцијата, пациентот може да ги контролира паметните апарати за домаќинство, да пребарува на интернет, да игра видеоигри и ја контролира инвалидската количка.
Експертите велат дека уредите како овој би можеле да го трансформираат животот на милиони луѓе ширум светот кои живеат со парализа. Веројатно најпознат е „Неуралинк“ имплантот на Илон Маск.
Во видеото објавено на Икс, пациентот на „Неуралинк“, Роки Стоутенбург – кој бил парализиран од 2006 година ја демонстрирал својата способност за поместување на роботската рака користејќи го умот, доближувајќи го екстремитетот до лицето и бакнувајќи го.
„Учесниците во нашите клинички испитувања ја проширија својата дигитална компјутерска контрола на физички уреди како помошните роботски раце“, соопштија од „Неуралинк“ на Икс, кој исто така е во сопственост на Маск.
„Со текот на времето планираме да го прошириме опсегот на уреди што може да се контролираат преку Неуралинк“. Маск изјавил дека повеќе од 10.000 лица се регистрирале во регистарот на пациенти на Неуралинк, надевајќи се дека ќе учествуваат во испитувањата на уредот.
