Платформата „X“ (поранешен Twitter), во сопственост на Илон Маск (54), повторно предизвика незадоволство кај корисниците поради проблеми со вчитување на содржината и пристап до сервисот. Страницата "DownDetector", која регистрира вакви прекини, забележа нагло зголемување на пријави, а паралелно и „Cloudflare“ официјално потврди дека нивната глобална мрежа во моментов се соочува со технички проблеми, пренесува "Newsweek".

Иако засега не е познато дали двата настана се поврзани, фактот што „Cloudflare“ обезбедува клучна интернет-инфраструктура за бројни сервиси – меѓу кои и „X“ – упатува дека проблемите кај корисниците би можеле да произлегуваат од поширока техничка нестабилност. Конкретна потврда, сепак, сè уште нема.

Проблеми се појавија и кај функционирањето на некои македонски портали, па некои од најчитаните медиуми воопшто не им беа достапни на корисниците.

Само неколку дена по падот на „Amazon Web Services“

Овој инцидент доаѓа само неколку дена по големиот прекин на „Amazon Web Services“, што повторно го отвори прашањето за стабилноста на најважните интернет-системи на глобално ниво.

„Cloudflare“ управува со огромна мрежа дата-центри ширум светот и функционира како заштитен слој помеѓу корисниците и веб-страниците. Делува како прокси, го насочува интернет-сообраќајот, филтрира потенцијални закани како "DDoS"-напади и ја забрзува испораката на содржини преку кеширање на податоците.

Токму поради тоа, „Cloudflare“ често им овозможува на веб-страниците да останат достапни дури и при ненадеен пораст на сообраќај или обид за преоптоварување на системот.