Таквиот пристап, како што објасни Морин за „CNBC“, не само што поттикнува значајни разговори меѓу родителите и децата, туку им помага и на децата да развијат емоционална свест, емпатија и таканаречен ментален раст – способност да учат од искуства и грешки.

Како да го поттикнете детето да зборува за својот ден?

Класичното прашање „Како помина во училиште?“ честопати не води далеку. Наместо тоа, Морин препорачува седум едноставни прашања кои отвораат дијалог и им помагаат на децата подобро да се разберат себеси и другите.

1. Што ти беше најубаво денес?

Ова прашање го охрабрува детето да се сети на позитивните моменти. За децата кои не го сакаат училиштето, фокусирањето на добрите работи може да помогне во развојот на оптимизмот и благодарноста. Родителите можат самите да дадат пример: „Најдобриот дел од мојот ден денес беше прошетката за време на паузата. А твојот?“.

2. Дали згреши нешто денес и што научи од тоа?

Морин нагласи дека е важно децата да се учат дека грешките се дел од учењето. Отвореното зборување за грешките го намалува срамот и им помага да ги видат како можности за раст. „Дали се случи нешто денес што би го направил/а поинаку следниот пат?“, го даде како пример.

3. Кој те направи горд/а денес?

Ова прашање го насочува вниманието кон другите и ја поттикнува емпатијата. Така децата учат да го препознаваат трудот, љубезноста и успесите на своите врсници. „Мојата пријателка ја заборави ужината, па ја споделив мојата со неа“, би можел да биде еден одговор, тврди психотерапевтката.

4. Што би го направило денешниот ден уште подобар?

Ова прашање им помага на децата да ги препознаат фрустрациите без да се задржуваат на нив и ги охрабрува да размислуваат за решенија. „Да имав магично стапче, ќе го продолжев времето на часот по ликовно“, е пример за имагинативен одговор што ги открива желбите на децата.

5. Дали му помогна некому денес?

Овие прашања развиваат чувството на заедница и важноста на љубезноста кај децата. Кога ги поставуваме редовно, децата почнуваат да бараат можности сами да им помогнат на другите.

6. Што беше најинтересното нешто што го научи денес?

Наместо да се фокусира само на оценките, ова прашање ја нагласува љубопитноста и радоста од учењето. Тогаш децата се отвораат и споделуваат интересни работи што навистина ги интересираат.

7. Дали има нешто ново што би сакал/а да го пробаш?

Морин го препорача ова прашање како начин родителите да ги охрабрат децата да истражуваат и да излезат од својата зона на удобност. Целта не е совршенство, туку храброст и желба за учење. „Дали има клуб или активност што би сакал/а да ја пробаш само еднаш?“, истакна психотерапевтката.