Храната што ја консумираме може да влијае на хемиските процеси во нашиот мозок. За смирувачки ефект, пробајте омега-3 масни киселини, достапни како додаток во исхраната (претежно капсули од рибино масло), за кои се смета дека помагаат во менталната и физичката благосостојба и, според некои студии, можат да го намалат и агресивното однесување, пишува „Саенс алерт“ (Science alert).
Покажано е дека додатокот во исхраната (омега-3 масни киселини) ја намалува агресијата до 28 проценти. Овие наоди не се изненадувачки со оглед на тоа што омега-3 масните киселини претходно се поврзани со превенција од шизофренија, додека се смета дека агресијата и антисоцијалното однесување се делумно предизвикани од неухранетост.
Истражувачите од Универзитетот во Пенсилванија ги следеа претходните, помали студии за ефектите од суплементацијата со омега-3 и нивното влијание врз агресијата. Нивната мета-анализа разгледа 29 рандомизирани контролирани испитувања со вкупно 3.918 учесници.
Во сите испитувања, беше пронајден скромен, но забележлив краткорочен ефект, што се преведува во намалување на агресијата до 28 проценти низ повеќе варијабли (вклучувајќи возраст, пол, медицинска дијагноза и должина и доза на третман).
„Мислам дека е време да се започне со употреба на суплементи со омега-3 масни киселини за намалување на агресивното однесување, без разлика дали е во заедницата, во клиниката или во системот на кривична правда“, рекол неврокриминологот Адријан Рејн кога беше објавена мета-анализата.
Тестовите вклучени во студијата, спроведени помеѓу 1996 и 2024 година, траеја во просек 16 недели. Тие вклучуваа различни демографски групи, од деца на возраст од 16 години и помлади до постари лица помеѓу 50 и 60 години.
Определеното намалување на агресијата вклучуваше и реактивна агресија (како одговор на провокација) и проактивна агресија (претходно смислено однесување). Пред оваа студија, не беше јасно дали омега-3 масните киселини можат да помогнат со овие различни видови агресија.
Иако ќе бидат потребни поголеми студии во подолги временски периоди за понатамошно утврдување на оваа врска, тоа придонесува за нашето разбирање за тоа како апчињата од рибино масло и омега-3 масните киселини во нив можат да бидат корисни за мозокот.
„Најмалку што родителите кои бараат помош за агресивно дете можат да направат е да им обезбедат на децата дополнителна порција риба секоја недела“, рекол Рејн.
Истражувачите веруваат дека процесот што им овозможува на омега-3 да го намалат воспалението, кое ги одржува виталните мозочни процеси, има врска со регулирањето на агресијата. Сè уште има многу неодговорени прашања, но тимот истражувачи сугерира дека има доволно докази за понатамошно истражување на оваа врска.
Додадете на ова знаење дека постојат студии кои покажуваат дека лековите добиени од рибино масло можат да помогнат во намалувањето на ризикот од фатални срцеви удари, мозочни удари и други проблеми со здравјето на срцето, и се чини дека нема сомнежи за додавање на омега-3 во вашата исхрана.
„Омега-3 не е магично стапче кое целосно ќе го реши проблемот со насилството во општеството. Сепак, врз основа на овие наоди, цврсто веруваме дека овој додаток може да помогне и треба да почнеме да дејствуваме врз основа на новото знаење што го имаме“, заклучил Рејн.
Истражувањето е објавено во списанието „Агресија и насилно однесување“.
